ШҚУ СТУДЕНТІ «TOUR DE OSKEMEN» ВЕЛОЖАРЫСЫНДА ҮЗДІК АТАНДЫ

Өскеменде қала тұрғындары мен қонақтары арасында «Tour de Oskemen» атты ауқымды веложарыс өтті. Облыс тұрғындарын қамтыған шарадан ЖОО-ның студенттері де қалыс қалмады. «Дене шынықтыру және спорт» білім беру бағдарламасының екінші курс студенті Алдияр Хасенов үздік әуесқой велошабандоз атанып қана қоймай, алтын иеленді.

Жас спортшы топтық және жекелей сында бақ сынады. Веложарыстың бірінші күні 22,5 шақырым қашықтықты қамтыды. Алдияр «Кәсіпқой» категориясы бойынша бірінші орынды иеленді.
Екінші күні қатысушылар 92 шақырым қашықтықты топтық деңгейде бағындыруға тырысты. ШҚУ студенті үздік нәтижесін бұл сында да қайталай білді.

-Мен жарыс өтетін жолды жақсы білемін. Жарысқа бір апта қалғанда сол жолда жаттыға бастадым. Маған іс-шара ұнады. Ауа-райы да көңіл-күйім де тамаша болды. Мұндай ауқымды іс-шараға бірінші рет қатысып тұрмын. Тәжірибе алғаныма, жақсы нәтиже көрсеткеніме өте қуаныштымын, — деп жеңімпаз өз әсерімен бөлісті.

Айта кетейік, әуесқой велошабандоз Алдияр Хасенов өзінің шеберлігін көрсете отырып, 300 000 теңге көлемінде ақшалай сертификат ұтып алды.