ҚАЗАҚСТАННЫҢ ТАНЫМАЛ ЖУРНАЛИСТІ ШЕБЕРЛІК СЫНЫБЫН ӨТКІЗДІ

С.Аманжолов атындағы ШҚУ-да Шығыс Қазақстан облысының әкімінің кеңесшісі, танымал журналист Алишер Сулейменовтың «Шығармашылықтың психологиялық аспектілері» тақырыбында  шеберлік сыныбы өтті. Шараға журналистика, қазақ және орыс филология кафедрасының студенттері қатысты.

Алишер Сулейменов — Қазақстандағы алғашқы телепродюсерлік қызмет пен қазақ тіліндегі алғашқы ток-шоудың негізін қалаушы, сондай-ақ отандық көптеген фильмдердің редакторы. Ол тәуелсіз БАҚ-тың «Алтын Жұлдыз» сыйлығының негізін қалаушы, Қазақстан киноөнері мен ғылым академиясының, Қазақстан журналистика академиясының, Кино және Журналистер одақтарының мүшесі.

Шеберлік сынып барысында спикер өзінің кәсіби тәжірибесінен мысалдар келтіріп, шығармашылық үдерістегі психологияның маңыздылығы туралы айтты. Ол шығармашылықта өзін-өзі көрсету мен аудитория психологиясын түсінудің маңызды екенін атап өтіп. Сонымен қатар, студенттер қызықтыратын сұрақтарды қойып, пікір алмасты.

— Бұл университет қабырғасында өткізген екінші шеберлік сыныбым. Мен болашақ мамандардың шынайы қызығушылығын байқадым. Өз тәжірибеммен бөлісіп, кәсіби маман болуға ұмтылған жастармен қарым-қатынасты жалғастыруды қалаймын, — деді журналист.

Алишер Сулейменов журналистің жұмысының маңызды аспектісіне — психологиялық тұрақтылықты сақтап, кәсіби күйзелістен  аулақ болуға ерекше назар аударды. Ол журналистердің жиі сынға ұшырап, моральдық қиындықтарға тап болатынын айтты. Осы орайда ол эмоционалдық теңгерімді сақтауға қатысты кеңестерімен бөлісті.

Шара соңында студенттерге тұлғалық өсу және бәсекеге қабілеттілікті арттыру бойынша құнды кеңестер берілді.