AMANZHOLOV UNIVERSITY СТУДЕНТТЕРІНІҢ СУ ЭКОЖҮЙЕЛЕРІНІҢ БИОӘРТҮРЛІЛІГІН САҚТАУҒА ЫНТАЛАНДЫРУ

Су экожүйелерінің биоәртүрлілігін сақтау – қазіргі экологияның өзекті мәселелерінің бірі. Қазақстанның теңізге шығатын жолы болмаса да, көптеген су айдындары, көлдері мен өзендері бар, олар экологиялық тепе-теңдікті сақтауда маңызды рөл атқарады. Су биоресурстарын ұтымды пайдалану, оларды қалпына келтіру және қорғау білікті мамандарды талап етеді. Бұл тұрғыда студенттердің балық шаруашылығы және су экологиясы саласындағы кәсіби мамандармен өзара іс-қимылы ерекше маңызға ие.

Осыған байланысты «6В05101 – Биология» және «6В08301 – Орман ресурстары, аңшылық және ара шаруашылығы» білім беру бағдарламаларының студенттерінің экологиялық жауапкершілігін қалыптастыру және кәсіби құзыреттіліктерін арттыру мақсатында Сәрсен Аманжолов атындағы Шығыс Қазақстан университетінің IT және жаратылыстану ғылымдары жоғары мектебінің биология кафедрасы «Интродукция және су ресурстарын ұтымды пайдалану» тақырыбында қонақ дәрісін ұйымдастырды.

Қонақ дәрісіне «Бұқтырма уылдырық-шабақ өсіру шаруашылығы» ЖШС басшысы Сымбат Ануарбеков және Алтай филиалы «Балық шаруашылығы ғылыми-өндірістік орталығы» ЖШС кешенді балық шаруашылығы зертханасының меңгерушісі Айбек Қасымханов шақырылды.

Дәріс барысында су экожүйелерін сақтау және қалпына келтірудің негізгі аспектілері қарастырылды. Мамандар су айдындарын балықтандыру, интродукциялау және олардың жағдайын бақылау бойынша тәжірибелерімен бөлісіп, бұл процестердің маңыздылығын түсіндірді. Сондай-ақ, Қазақстанда балық ресурстарын қалпына келтіру бойынша жүзеге асқан табысты жобалар мысал ретінде ұсынылды.

Болашақ мамандардың су биоресурстарын сақтаудағы рөлі, студенттердің мансаптық мүмкіндіктері және олардың ғылыми-зерттеу қызметіне қатысу жолдары ерекше назарға алынды.

Шара барысында студенттер өздерін қызықтырған сұрақтарын қойып, сала мамандарынан құнды жауаптар алды. Кәсіби мамандармен тікелей диалог студенттердің экологиялық мәселелерге деген қызығушылығын арттырып, олардың болашақ мамандықтарына деген жауапкершілік сезімін күшейтті.

Осындай іс-шараларды өткізу білім беру процесінің маңызды бөлігі. Ол студенттердің экологиялық мәселелерді терең түсінуіне, кәсіби дағдыларын дамытуына және табиғи ресурстарды қорғаудағы өз рөлін сезінуіне мүмкіндік береді.

Биология кафедрасы алдағы уақытта да балық шаруашылығының ғылыми-өндірістік орталықтарымен ынтымақтастықты жалғастырып, студенттерді ғылыми-зерттеу және экологиялық жобаларға тартуды жоспарлап отыр.

Іс-шара студенттердің кәсіби дамуына ғана емес, сондай-ақ экологиялық жауапкершілігі жоғары қоғам қалыптастыруға да өз үлесін қосады.