ҚАЗАҚСТАН ХАЛҚЫНЫҢ БІРЛІГІ КҮНІ – ЖАСТАР КӨЗІМЕН

Жастар ісі жөніндегі комитет мүшелері Қазақстан халқының бірлігі күніне арналған дөңгелек үстел ұйымдастырды. Іс-шараға тәрбие және әлеуметтік жұмыс жөніндегі проректор Жаннета Қалимолдина, сондай-ақ академиялық ұтқырлық бағдарламасы аясында Тәжікстан мен Кореядан келген шетелдік студенттер қатысты.

— Қазақстан халқының бірлігі мерекесі әртүрлі этнос өкілдері арасындағы байланысты нығайту мақсатында 1996 жылдан бері тойланып келеді. Бұл күні қазақстандықтар мемлекет негіздеген «Әралуандықтағы бірлік» ұстанымын ұлықтайды, — деді Жаннета Қалимолдина.

Сонымен қатар, ол Мемлекет басшысының қарым-қатынас тілі ретінде еркін таңдау құқығы болу керек деген ойының маңыздылығын атап өтті. Еске салайық, Қасым-Жомарт Тоқаев Қазақстанда қарым-қатынас тілі ретінде қай тілді қолданатыны адамның өз таңдау еркіндігінде деп айтқан болатын.

Жиын барысында студент жастар мемлекеттік мерекенің тарихы мен маңызына қатысты викториналық сұрақтарға жауап берді. Дөңгелек үстел соңында қатысушылар бір-біріне әр тілде ізгі тілектерін білдіріп, естелік фотосуретке түсті.