ШҚУ СТУДЕНТТЕРІ ҚҰҚЫҚТЫҚ СТАТИСТИКА САЛАСЫНДА КӘСІБИ БІЛІМДЕРІН КЕҢЕЙТТІ

ҚР Бас прокуратурасы Құқықтық статистика және арнайы есепке алу жөніндегі комитетінің Шығыс Қазақстан облысы бойынша департаментінде Ашық есік күні өтті. Аталған іс-шараға С.Аманжолов атындағы Шығыс Қазақстан университетінің студенттері мен оқытушылары белсене қатысып, кәсіби бағдар мен құқықтық саланың заманауи құралдарымен танысу мүмкіндігіне ие болды.

Іс-шара аясында студенттерге құқықтық статистика органдарының қызметі, даму бағыттары және цифрлық жобалары таныстырылды. Атап айтқанда, «Е-қылмыстық іс», «Әкімшілік істердің бірыңғай тізілімі», «Е-өтініш» жүйелері мен «Қылмыстық құқық бұзушылықтар картасы» жобасы бойынша мазмұнды ақпарат ұсынылды.

Комитет порталы – Qamqor.gov.kz арқылы мемлекеттік қызметтерді өз бетінше алу мүмкіндіктері түсіндіріліп, интерактивті кейстер мен сұрақ-жауап форматындағы тапсырмалар қатысушылардың ерекше қызығушылығын тудырды.

Ашық есік күніне қатысу – ШҚУ студенттері үшін теориялық білімдерін нақты тәжірибемен ұштастырып, болашақ кәсіби бағытын айқындауға маңызды қадам болды.