АМАНЖОЛОВ УНИВЕРСИТЕТІНІҢ СТУДЕНТІ — ХАЛЫҚАРАЛЫҚ БАЙҚАУ ЖЕҢІМПАЗЫ

Шығыс Қазақстандағы Сәрсен Аманжолов атындағы университеттің «Тіршілік қауіпсіздігі және қоршаған ортаны қорғау» білім беру бағдарламасының студенті Жанзада Ержанова «Орталық Азияның үздік студенті» халықаралық байқауының жеңімпазы атанды.

Байқауды «Білім Инновация Орталығы» ұйымдастырып, өңірдің түкпір-түкпірінен дарынды студенттерді біріктірді. Іріктеу қорытындысы бойынша Жанзада жүлделі орынға ие болып, оқу, ғылыми және қоғамдық қызметтегі жоғары деңгейін көрсетті.

Байқауға қатысу үшін студент толық құжаттар пакетін, соның ішінде оқу кезеңіндегі барлық жетістіктері қамтылған портфолиосын ұсынды. Ұсынылған материалдар оның академиялық үлгерімі, ғылыми әлеуеті және белсенді азаматтық ұстанымын айқын дәлелдеді.

Жанзада Ержанова — «Алтын белгі» иегері және республикалық грант жеңімпазы. Университетте оқу барысында ол өзін жауапты, тәртіпті және мақсатшыл студент ретінде көрсете білді. Оның жоғары академиялық дайындығы GPA көрсеткішімен расталады — 3,83. Сонымен қатар, Жанзада Президенттік стипендия иегері.

Студент Жоғары мектептің ғылыми және білім беру қызметіне белсенді қатысып, зерттеу жұмыстарына бастамашылдық танытады және аналитикалық ойлау қабілетімен ерекшеленеді. Ол жеке және командалық жұмысты сәтті ұштастырып, көшбасшылық және ұйымдастырушылық қабілеттерін көрсетіп келеді.

Оның кәсіби қалыптасуында халықаралық академиялық ұтқырлық тәжірибесі ерекше рөл атқарды. «Orhun Exchange Program» бағдарламасы аясында Жанзада Әзірбайжанның Баку мемлекеттік университетінде білім алып, өз білімін кеңейтіп қана қоймай, халықаралық деңгейде туған университетінің абыройын асқақтатты.

Жоғары мектептің IT және жаратылыстану ғылымдары факультетінің деканы С. Әдіқанованың айтуынша, Жанзада Ержанова — еңбекқорлықтың, мақсатқа ұмтылудың және жоғары әлеуеттің үлгісі. Ол оқытушылар мен студенттер арасында үлкен құрметке ие, өзін ашық мінезді, жауапты әрі адал тұлға ретінде таныта білді.

Беделді халықаралық байқаудағы жеңіс оның академиялық мансабындағы тағы бір маңызды жетістік болып, Сәрсен Аманжолов атындағы Шығыс Қазақстан университеті студенттерінің халықаралық деңгейде бәсекеге қабілетті екенін дәлелдеді.

Жанзадаға алдағы уақытта толағай табыстар, жаңа жетістіктер және алға қойған мақсаттарына нық қадаммен жете беруіне тілектеспіз!