АМАНЖОЛОВ УНИВЕРСИТЕТІ ЦИФРЛЫҚ ҚАУІПСІЗДІК ЖӨНІНДЕГІ ӨҢІРЛІК ФОРУМҒА ҚАТЫСТЫ

Бүгін Шығыс Қазақстан облыстық филармониясында цифрлық қауіпсіздік және интернет-алаяқтыққа қарсы іс-қимыл тақырыбына арналған маңызды және өзекті форум өтті. Қазіргі әлем қарқынды дамып келе жатқандықтан, цифрлық ортадағы қауіптер де күн сайын артып отыр. Осы ретте Сәрсен Аманжолов атындағы Шығыс Қазақстан университеті форум жұмысына белсенді қатысып, жастардың цифрлық сауаттылығын арттыру бағытындағы өңірлік бастаманы қолдады.

Шара барысында қатысушылар интернет-алаяқтықтың нақты мысалдарын көріп, заманауи киберқатерлердің қалай жұмыс істейтінін түсінді, сондай-ақ спикерлер мен сарапшылардан практикалық ұсыныстар алды. Форумның назар аударарлық бөліктерінің бірі — танымал блогер Әли-Әскер Байгужиннің нақты оқиғаларға сүйенген бейнематериалдары және онлайн ортада өзін қорғау жолдары туралы мазмұнды баяндамасы болды.

Amanzholov University атынан қатысқан «Бизнес және құқық жоғары мектебінің» оқу ісі жөніндегі декан орынбасары Динара Мамырбекова цифрлық алаяқтықтың алдын алудың жаңа әдістерін қамтыған мазмұнды баяндама жасап, аудитория тарапынан үлкен қызығушылық тудырды. Оның практикалық кеңестері мен талдауы форумның жалпы мазмұнын байыта түсті.

Іс-шараны ұйымдастырушыларға, шақырылған сарапшылар мен блогерлерге және белсенді қатысқан студенттерге шынайы алғыс білдіреміз. Мұндай форумдар жастардың цифрлық мәдениетін көтеріп қана қоймай, жауапты онлайн-құлықты қалыптастыруға мүмкіндік береді.

Amanzholov University шығармашылық ұжымдарының дайындаған өнер бағдарламасы да форумға ерекше ажар беріп, қатысушыларға жағымды көңіл күй сыйлады.

Форумнан алынған ақпарат пен дағдылар қатысушыларға цифрлық ортада өздерін сенімді әрі қауіпсіз ұстауға мүмкіндік беретініне сенеміз. Сәрсен Аманжолов атындағы Шығыс Қазақстан университеті жастардың цифрлық құзыреттілігін дамыту және қауіпсіз білім беру ортасын қалыптастыру бағытындағы жұмысын әрі қарай да тұрақты түрде жалғастырады.