АМАНЖОЛОВ УНИВЕРСИТЕТІ ҒАЛЫМДАРЫНЫҢ ҒЫЛЫМИ ІССАПАРЫ: ТӘЖІРИБЕ АЛМАСУ ЖӘНЕ DEI САЛАСЫНДАҒЫ ЖАҢА ХАЛЫҚАРАЛЫҚ ЫНТЫМАҚТАСТЫҚ

Сәрсен Аманжолов атындағы Шығыс Қазақстан университетінің жетекші ғылыми қызметкерлері Лариса Назырова мен Елена Барабанова «Қоғамдық жаңғыру жағдайында қазақстандық компанияларда DE&I мәдениетін қалыптастырудың әлеуметтік-психологиялық қолдауы» (IRN AP23489784) гранттық жобасы аясында Италияның Генуя қаласындағы Генуя университетінде және Германияның Дуйсбург қаласындағы Дуйсбург–Эссен университетінде ғылыми іссапарда болды.

Іссапардың мақсаты — Еуропадағы DEI (Diversity, Equity, Inclusion – Әртүрлілік, Теңдік, Инклюзия) қағидаттарын білім беру және корпоративтік құрылымдарда енгізу тәжірибесін зерттеу, шетелдік университеттермен әріптестік орнату және инклюзивтіліктің тиімді тәжірибелерін Қазақстан жағдайына бейімдеу мүмкіндіктерін айқындау.

Генуя университетіндегі кездесу барысында профессор Гуидо Франко Аморетті және Педагогикалық ғылымдар департаментінің директоры, даму және білім психологиясы кафедрасының профессоры Мария Кармен Узаймен келіссөздер өтті. Тараптар ғылыми әдістермен алмасу, бірлескен басылымдар және академиялық ұтқырлық бағыттарын талқылады.

Аманжолов университетінің жобалық тобы Developmental and Educational Psychology Research Group ғылыми тобы және Polo Bozzo Research Unit орталығымен кездесіп, қазақстандық ұйымдарда DEI мәдениетін қалыптастыруға бағытталған зерттеулерді таныстырды. Профессорлар Сабрина Панези және Лаура Траверсо когнитивтік дағдыларды дамыту және инклюзивті білім беру ортасын қалыптастыруда цифрлық және аналогтық ойындарды қолдану тәжірибесімен бөлісті.

Сонымен қатар, цифрлық гуманитаристика саласының PhD докторы, инклюзивті педагог Рита Черсосимомен кездесу өтті. Жиында ерекше білім беруді қажет ететін адамдарды оқыту, қолдау және әлеуметтік бейімдеу үшін жасанды интеллект пен цифрлық технологияларды қолдану мәселелері талқыланды.

Дуйсбург–Эссен университетінде жобалық топ Еңбек және біліктілік институтының (IAQ) директоры, профессор Уте Кламмермен кездесті. Германияның әлеуметтік саясаты, әлсіз топтарды еңбек нарығына тарту және корпорациялардағы инклюзия тәжірибелері талқыланды.

IAQ ғылыми ұжымымен өткен консультацияларда Erasmus+ және Horizon Europe бағдарламалары аясында ынтымақтастық, бірлескен жарияланымдар және халықаралық ғылыми серіктестікті дамыту перспективалары қарастырылды.

Сондай-ақ, Реклингхаузен округінің жұмыспен қамту орталығының маманы Елена Буравцева тәжірибесімен бөлісті. Ол азаматтарды жұмыспен қамту және кәсіби дамыту бойынша тиімді модельді таныстырды. Жеке қолдау көрсету, тең мүмкіндіктер және секторлар арасындағы серіктестік қағидаттарына негізделген бұл тәжірибе Қазақстанда да қолдануға лайық деп танылды.

Іссапар қорытындысы бойынша бірлескен зерттеулер жүргізу, ғылыми мақалалар жариялау, академиялық алмасу және еуропалық DEI практикаларын қазақстандық білім беру және корпоративтік ортаға бейімдеу бойынша келісімдерге қол жеткізілді.