ШЫҒЫС ҚАЗАҚСТАН ОБЛЫСЫНДАҒЫ ЖАСТАР САЯСАТЫНЫҢ ЖАҢА СТРАТЕГИЯСЫН ІСКЕ АСЫРУ: AMANZHOLOV UNIVERSITY СТУДЕНТТЕРІ ХОККЕЙ ТУРНИРІНДЕ

Бүгін Сәрсен Аманжолов атындағы Шығыс Қазақстан университетінің студенттері Шығыс Қазақстан облысында жастар саясатының жаңа стратегиясын іске асыру аясында ұйымдастырылған спорттық іс-шара — хоккей матчын тамашалады. Іс-шара Шығыс Қазақстан облысының прокуратурасы мен облыс әкімдігі бірлесіп бастамашы болған қалалық мектеп оқушылары арасындағы «Қысқы спорт-фест» хоккей жарыстары шеңберінде өтті.

Аталған іс-шараның негізгі мақсаты — жастар арасында салауатты өмір салтының құндылықтарын қалыптастыру, патриотизм мен азаматтық жауапкершілікті тәрбиелеу. Спорт арқылы студенттердің бірлік, ұйымшылдық және белсенді азаматтық ұстанымын нығайту көзделді. Бұл бағыттар өңірдегі жастар ортасын дамыту мен тәрбиелік жұмыстың маңызды құрамдас бөлігі болып табылады.

Спорттық шара Борис Александров атындағы мұз сарайында өтіп, спорт пен белсенді өмір салтын қолдайтын көптеген жас көрермендерді жинады. «Қысқы спорт-фест» жарыстары аясында өткен хоккей матчын тамашалау студенттер үшін жарқын әрі есте қаларлық оқиғаға айналып, жастарды өңірдегі әлеуметтік маңызы бар бастамаларға тартудың жүйелі жұмысының бір бөлігі болды.