ӨНЕР АРҚЫЛЫ ИНКЛЮЗИЯ: АМАНЖОЛОВ УНИВЕРСИТЕТІНІҢ ТӘЖІРИБЕСІ

Сәрсен Аманжолов атындағы Шығыс Қазақстан университетінде Педагогика жоғары мектебінің әдістемелік онкүндігі аясында инклюзивті білім беру мәселелері мен өнердің бала тұлғасын дамытудағы рөліне арналған мазмұнды іс-шара өтті.

«Музыка арқылы жарқыраған әлем» тақырыбында №19 орта мектептің музыка пәні мұғалімі А.С. Мұхамеджанов баяндама жасады. Өз сөзінде педагог инклюзивті білім беру жағдайында оқушылармен жұмыс істеудің практикалық тәжірибесін таныстырып, кәсіби шеберлігі мен әрбір балаға деген ерекше назарын көрсетті.

Іс-шараның практикалық бөлімі ерекше әсер қалдырды. Оқушылардың музыкалық шығармаларды концерттік орындауы арқылы музыка мүмкіндігі шектеулі және түрлі білім беру қажеттіліктері бар балалардың дамуына, әлеуметтенуіне және өзін-өзі көрсетуіне ықпал ететін тиімді құрал екені айқын көрінді. Әрбір өнер нөмірі эмоциялық тереңдігімен, сахналық мәдениетімен және орындаушылардың даралығымен ерекшеленіп, қатысушылардың шығармашылық әлеуетін ашуға мүмкіндік берді.

Педагог балаларға қолдау, қабылдау және сенім атмосферасын қалыптастыра білді. Мұндай ортада әрбір бала өзін маңызды әрі табысты сезінеді. Бұл – инклюзивті білім берудің басты қағидаларының бірі. Ал музыка осы жағдайда балаларды біріктіретін, олардың ішкі әлемін ашып, үйлесімді дамуына ықпал ететін әмбебап тіл ретінде көрінді.

Іс-шара соңында Сәрсен Аманжолов атындағы Шығыс Қазақстан университетінің ректорының атынан А.С. Мұхамеджановқа жоғары кәсібилігі, шығармашылық ізденісі және инклюзивті білім беруді дамытуға қосқан елеулі үлесі үшін алғыс хат табысталды. Концерттік бағдарламаға қатысқан оқушылар да университет ректорының атынан грамоталармен марапатталды.

Аталған іс-шара өнердің білім беру үдерісіндегі маңызды құрал екенін тағы бір мәрте дәлелдеп, әрбір бала үшін қолдаушы әрі инклюзивті орта қалыптастырудың тиімді жолдарын көрсетті.