AMANZHOLOV UNIVERSITY БАЗАСЫНДА БОС ЖҰМЫС ОРЫНДАРЫ ЖӘРМЕҢКЕСІ ӨТТІ

Сәрсен Аманжолов атындағы Шығыс Қазақстан университетінің базасында түлектерді мемлекеттік қызметке жұмысқа орналастыруға бағытталған бос жұмыс орындары жәрмеңкесі өтті.

Іс-шараны Шығыс Қазақстан облысы бойынша Мемлекеттік қызмет істері агенттігінің департаменті мен Шығыс Қазақстан облысының Еңбек мобильділігі орталығы бірлесе ұйымдастырды.

Жәрмеңкеге Өскемен қаласы, Ұлан және Глубокое аудандарынан келген 26 жұмыс беруші мен 2025 жылғы 368 жоғары оқу орнының түлегі қатысты.

Қатысушыларға металлургия, құрылыс, энергетика, көлік, логистика, білім беру және денсаулық сақтау салаларын қамтитын 300-ден астам өзекті бос жұмыс орындары ұсынылды.

Шығыс Қазақстан облысының Еңбек мобильділігі орталығының директоры Арайлым Есимбекова мұндай бастамалардың белсенді және бәсекеге қабілетті еңбек нарығын қалыптастырудағы маңызын атап өтті:

– Бүгін біз жұмыс берушілер мен жас мамандар тарапынан жоғары белсенділікті байқадық. Аймақта кадрларға деген сұраныс үнемі артып келеді, ал біздің міндетіміз – түлектерге өз орындарын кәсіби ортада табуға көмектесу. Біз облыс жоғары оқу орындарымен, соның ішінде Аманжолов университетімен тығыз байланыста жұмыс істейміз және түлектердің еңбекке дайын екенін көріп отырмыз. Биыл біз өткен жылғы түлектерді де шақырып, олардың жұмысқа орналасу мүмкіндіктерін кеңейттік, – деді Арайлым Есимбекова.

Сәрсен Аманжолов атындағы Шығыс Қазақстан университеті білім беру мен еңбек нарығы арасындағы байланысты нығайтуға бағытталған осындай бастамаларды белсенді түрде қолдайды.

Университет студенттердің практикалық дағдыларын дамытуға, кәсіби құзыреттерін қалыптастыруға және қазіргі қоғамда сұранысқа ие мамандарды даярлауға ерекше мән береді.