AMANZHOLOV UNIVERSITY СПОРТШЫЛАРЫ: ӨҢІР МЕН ЕЛ МАҚТАНЫШЫ

Тәуелсіздік күні қарсаңында Шығыс Қазақстан облысы әкімдігінде өңірдің үздік спортшыларын салтанатты марапаттау рәсімі өтті. Бұл марапаттар әлем және Азия чемпионаттарында, халықаралық турнирлерде, Спартакиада мен республикалық жарыстарда облыс пен ел намысын абыроймен қорғап жүрген спортшыларға табысталды. Жетістіктер – көпжылдық табанды еңбектің, қатаң тәртіптің және таңдаған ісіне деген шынайы адалдықтың нәтижесі.

Шығыс Қазақстан спортшылары Қазақстанның медаль қоржынына тұрақты түрде қомақты үлес қосып келеді. Марапатталғандар қатарында Сәрсен Аманжолов атындағы Шығыс Қазақстан университетінің студенттері де бар. Олар оқу мен кәсіби спортты сәтті ұштастырып, өз университеті мен өңірінің атын халықаралық деңгейде танытып жүр. Бұл жетістіктер спортшыларды даярлаудың жоғары деңгейін және жаттықтырушылар құрамының жүйелі жұмысын айқын көрсетеді.

Университет спортындағы жарқын өкілдердің қатарында кикбоксингтен Ернұр Қайырбеков пен Мақсат Ерланұлы ерекше аталды.

Ернұр Қайырбеков — Аманжолов университетінің «Дене шынықтыру және спорт» білім беру бағдарламасының 3-курс студенті. Ол — кикбоксингтен Әлем кубогының екі дүркін иегері, ересектер арасында Қазақстанның қазіргі чемпионы, әлем чемпионатының жүлдегері, халықаралық дәрежедегі спорт шебері.

Мақсат Ерланұлы — Аманжолов университетінің Жоғары педагогика мектебінің студенті, кикбоксинг спортынан өнер көрсетеді. Ол — әлем чемпионатының финалисі, Азия чемпионы, Әлем кубогының иегері, халықаралық дәрежедегі спорт шебері.

Спортшылар мен жаттықтырушылардың еңбегін атап өткен өңір басшылығы кәсіби әрі қолайлы спорттық орта қалыптастырудың маңызын ерекше атап өтті. Спорт инфрақұрылымын дамыту және қолдау бағдарламаларын кеңейту — жаңа чемпиондарды тәрбиелеудің және салауатты өмір салтын насихаттаудың негізгі алғышарты болып қала береді.

Сәрсен Аманжолов атындағы Шығыс Қазақстан университеті алдағы уақытта да спортты жүйелі түрде дамытып, дарынды спортшылар мен олардың тәлімгерлеріне қолдау көрсетуді, жаттығулар мен жарыстардың қолжетімділігін арттыруды жалғастырады. Біздің спортшылардың жеңістері өңір мен елдің халықаралық аренадағы беделін нығайтып, өскелең ұрпаққа үлгі болуда.