AMANZHOLOV UNIVERSITY ҒАЛЫМДАРЫНЫҢ ХАЛЫҚАРАЛЫҚ ҒЫЛЫМИ ІССАПАРЫ

Сәрсен Аманжолов атындағы Шығыс Қазақстан университетінің ғалымдары халықаралық ғылыми ынтымақтастықты дамыту және ғылыми тәжірибе алмасу бағытындағы жұмыстарын жүйелі түрде жалғастыруда. Осы ретте AMANZHOLOV UNIVERSITY өкілі, психология ғылымдарының докторы Наталья Ладзина Ресей Федерациясының Саратов қаласында өткен «Әлеуметтік өзгерістер жағдайындағы тұлға» атты халықаралық ғылыми конференцияға қатысты.

Аталған іссапар «Қоғамдық жаңғыру жағдайында қазақстандық компанияларда DE&I мәдениетін қалыптастырудың әлеуметтік-психологиялық қолдауы» тақырыбындағы гранттық жоба (AP23489784) аясында жүзеге асырылды. Конференция Н.Г. Чернышевский атындағы Саратов ұлттық зерттеу мемлекеттік университетінің базасында өтті және әлеуметтік-психологиялық ғылымдардың өзекті мәселелерін талқылауға арналған халықаралық диалог алаңына айналды.

Конференция барысында Наталья Ладзина Қазақстан Республикасындағы заманауи ұйымдардың ерекшеліктерін негізге ала отырып, әділетті және қолдаушы ұйымдық ортаны қалыптастыру үдерісіндегі өзгерістерге қарсылықтың психологиялық механизмдерін талдауға арналған ғылыми баяндамасын ұсынды. Баяндама қатысушылар тарапынан жоғары қызығушылық тудырып, ғылыми пікірталасқа арқау болды.

Ғылыми іссапар аясында Наталья Ладзина «Ұйымдық психология» білім беру бағдарламасы бойынша магистрлік диссертациялардың ашық қорғалуына қатысып, шақырылған сарапшы ретінде сөз сөйледі. Сондай-ақ ол Мемлекеттік аттестациялық комиссия жұмысына қатысу арқылы ұйымдық және әлеуметтік психология саласындағы заманауи зерттеу әдістерін, магистранттарды даярлаудың әдіснамалық және қолданбалы ерекшеліктерін талқылауға мүмкіндік алды. Бұл тәжірибе Қазақстан мен Ресей Федерациясы жоғары оқу орындарындағы кадр даярлау жүйесін салыстыруға және өзара кәсіби тәжірибе алмасуға жол ашты.

Өткізілген ғылыми және жұмыс кездесулері AMANZHOLOV UNIVERSITY-дің «Психология және коррекциялық педагогика» кафедрасының ғылыми мүдделері мен ағымдағы жобалық қызметіне толық сәйкес келеді. Іссапар нәтижелері жоғары оқу орындары арасындағы серіктестікті нығайтуға, сондай-ақ халықаралық ғылыми ынтымақтастықты одан әрі кеңейтуге елеулі үлес қосты.