AMANZHOLOV UNIVERSITY: DIGITAL NAURYZ-2026: ҰЛТТЫҚ РУХ ПЕН ДӘСТҮР ТОҒЫСҚАН МЕРЕКЕ

22 Наурыз – ұлыстың ұлы күні, қазақ халқының ең қастерлі мерекелерінің бірі. Бұл күн – табиғаттың жаңарып, күн мен түн теңеліп, жаңа жылдың басталуын білдіреді. Наурыз – тек табиғаттың ғана емес, адамзаттың да рухани жаңару кезеңі.

Сәрсен Аманжолов атындағы Шығыс Қазақстан университеті ұжымы бұл мерекеге белсене қатысты. Біз орталық алаңда киіз үй тігіп, оның ішін ұлттық нақышта безендірдік. Киіз үй ішінде біздің студенттер қонақтарды жылы қарсы алып, домбырамен күйлер орындап, мерекелік көңіл күй сыйлады. Сонымен қатар, келген қонақтарға ұлттық тағамдар ұсынылып, Наурыздың берекесі мен кең пейілі айқын сезілді.

Наурыз мерекесін жоғары оқу орындарында кең көлемде атап өту дәстүрге айналып келеді. Мұндай мерекелік іс-шаралар аясында киіз үй тігіліп, оның ішінде ұлттық өнер дәріптеліп, домбырамен ән шырқалып, ұлттық тағамдар ұсынылады. Киіз үй – қазақ халқының мәдениеті мен бірлігінің символы ретінде ерекше мәнге ие. Осындай бастамалар жастардың ұлттық мұраға деген қызығушылығын арттыруға ықпал етеді.

Сонымен қатар, қазіргі заман талабына сай «DIGITAL НАУРЫЗ» форматы да өзекті бола түсуде. Студенттер әлеуметтік желілер арқылы ұлттық дәстүрді насихаттап, түрлі шығармашылық жобалар ұсына отырып, мәдениетті жаңа қырынан танытуға мүмкіндік алады. Бұл – дәстүр мен жаңашылдықтың үйлесімді байланысының айқын көрінісі.

Наурыз – татулық пен бірліктің, ізгілік пен мейірімнің мерекесі. Сондықтан бұл күнді тек мерекелік шара ретінде ғана емес, рухани құндылықтарды дәріптейтін маңызды кезең ретінде қарастыруға болады. Білім мен тәрбие ұштасқанда ғана саналы, ұлттық болмысы қалыптасқан ұрпақ өседі.