FINIQ: УНИВЕРСИТЕТТЕ ҚАРЖЫЛЫҚ ҚАУІПСІЗДІК ДИКТАНТЫ БАСТАЛДЫ

Сәрсен Аманжолов атындағы Шығыс Қазақстан университетінде Қазақстан Республикасының Қаржылық мониторинг агенттігі ұйымдастырған республикалық жоба – «Қаржылық қауіпсіздік диктанты (FinIQ) басталды.

Бұл бастаманың басты мақсаты – азаматтардың қаржылық сауаттылығын арттыру, қаржылық алаяқтықтың алдын алу және экономикалық тәуекелдерден қорғану мәдениетін қалыптастыру.

Сәрсен Аманжолов атындағы Шығыс Қазақстан университеті бұл жобаны қолдай отырып, барлық студенттерді, оқытушыларды, қызметкерлер мен түлектерді қаржылық қауіпсіздік мәдениетін дамытуға бағытталған диктантқа белсенді қатысуға шақырады.

FinIQ диктанты – бұл тек білімді тексеру емес, ұлттық маңызы бар жоба. Ол азаматтардың қаржылық мәдениеті мен жауапкершілігін арттырып, қаржы саласындағы қауіптерге қарсы тұру дағдыларын дамытуға бағытталған.

Қарқынды цифрлық және экономикалық өзгерістер жағдайында қаржылық сауаттылық адамның өмір сапасына, отбасының тұрақтылығына және мемлекеттің қауіпсіздігіне әсер ететін аса маңызды факторға айналып отыр.

Университет студенттер мен оқытушылар арасында тек кәсіби құзыреттерді ғана емес, сонымен қатар қаржылық, құқықтық және азаматтық мәдениетті қалыптастыруға ерекше мән береді.

Университет ректоры атап өткендей, диктантқа қатысу – әрбір азаматтың жеке және ұлттық қауіпсіздікке қосқан үлесі:

«Қаржылық сауаттылық – жауапты азамат болудың ажырамас бөлігі. Өз қаржылық білімімізді арттыра отырып, біз қоғамның тұрақтылығын нығайтамыз», – деді ол.

Қазақстан Республикасының Президенті Қасым-Жомарт Кемелұлы Тоқаев та атап өткендей:

«Заң мен тәртіп – елдің дамуы мен азаматтардың қауіпсіз өмірінің басты кепілі».

Сәрсен Аманжолов атындағы Шығыс Қазақстан университеті барша қазақстандықтарды қаржылық қауіпсіздік диктантына қатысып, өз білімдерін сынап, сауатты, жауапты және қауіпсіз қоғам қалыптастыруға үлес қосуға шақырады.