ӨМІРГЕ ТЕҢ ЖОЛ: ДӘРІГЕРДЕН ПРОФЕССОРҒА ДЕЙІН

Зайнелова Гүлмира Зайнелқызы — медицина ғылымдарының докторы, профессор, Халықаралық шығармашылық академиясының академигі, Еуропалық пульмонологтар қоғамының мүшесі — отандық ғылымға, білім беру ісіне және практикалық денсаулық сақтау саласына елеулі үлес қосқан тұлға.

Гүлмира Зайнелқызы 1948 жылдың 5 шілдесінде дүниеге келген. 1973 жылы Семей мемлекеттік медицина институтын «емдеу ісі» мамандығы бойынша тәмамдаған. Еңбек жолын 1973–1976 жылдары өндірістік емхананың цех дәрігері ретінде бастаған.

1976–1994 жылдары Өлкелік патология ғылыми-зерттеу институтының кәсіби патология клиникасындағы аллергология бөлімін басқарып, жоғары білікті маман әрі денсаулық сақтау ісінің білікті ұйымдастырушысы ретінде танылды.

1994 жылдан бастап оның кәсіби қызметі Сәрсен Аманжолов атындағы Шығыс Қазақстан университетімен тығыз байланысты болды. Мұнда ол клиникалық пәндер кафедрасының меңгерушісінен бастап Педагогика жоғары мектебінің мәдениет, спорт және алғашқы әскери дайындық кафедрасының профессоры деңгейіне дейінгі жолдан өтті.

1990 жылы «Кенді Алтай поллиноздары» тақырыбында кандидаттық диссертация қорғады. 2010 жылы өнеркәсіптік кәсіпорын қызметкерлеріндегі жүрек-қан тамыр жүйесінің функционалдық өзгерістері мен психофизиологиялық бұзылыстарды зерттеуге арналған докторлық диссертациясын сәтті қорғап, медицина ғылымдарының докторы ғылыми дәрежесін алды. 2002 жылы доцент ғылыми атағы берілді.

Гүлмира Зайнелқызы медициналық білім беруді дамытуға зор үлес қосып, университеттің медициналық-профилактикалық факультетін ашуға атсалысты. Өскемен қаласындағы Қазақ физиологиялық қоғамы филиалының төрайымы болды, ал 2013 жылы Халықаралық шығармашылық академиясының академигі болып сайланды.

Оның ғылыми мұрасы 100-ден астам еңбекті қамтиды, оның ішінде монографиялар, оқу-әдістемелік құралдар және бір өнертабыс бар. Ол әртүрлі деңгейдегі ғылыми-тәжірибелік конференцияларға белсенді қатысып, еңбек физиологиясы мен адам экологиясы салаларында зерттеулер жүргізді.

Ғылыми және педагогикалық қызметімен қатар, Гүлмира Зайнелқызы жоғары санатты тәжірибелі дәрігер ретінде медициналық мекемелерге кеңес беріп, өнеркәсіптік кәсіпорын қызметкерлерін профилактикалық тексерулерге қатысып отырды.

Көпжылдық еңбек жолында ол талапшыл әрі жоғары кәсіби деңгейдегі оқытушы, жас ұрпақтың тәлімгері, үлкен жауапкершілік пен принципшілдік иесі ретінде танылды. Оның бойынан әрдайым мейірімділік, жанашырлық және әріптестері мен студенттеріне деген құрмет байқалатын. Ол кәсіби ортада зор беделге ие болды.

Гүлмира Зайнелқызының еңбегі көптеген марапаттармен және алғыс хаттармен атап өтілді. Олардың қатарында Қазақстан Республикасы Білім және ғылым министрлігінің, Өскемен қаласы әкімдігінің және медициналық мекемелердің құрмет грамоталары бар. Сонымен қатар, оған Сәрсен Аманжолов атындағы Шығыс Қазақстан университетінің «Университет мақтанышы» және «Құрметті профессор» атақтары берілді.

Көрнекті ғалым, дәрігер және ұстаз Зайнелова Гүлмира Зайнелқызының жарқын бейнесі әріптестері, шәкірттері және оны таныған жандардың жүрегінде мәңгі сақталады.