ШҚУ-ДА АРНАЙЫ ПЕДАГОГТАРДЫ ДАЯРЛАУ ЖӘНЕ ОҢАЛТУ МӘСЕЛЕЛЕРІ ТАЛҚЫЛАНДЫ

Оқу-әдістемелік бірлестік отырысының екінші секциясы арнайы педагогтарды даярлауға, оңалту мәселесіне және инклюзиядағы жаңа бағыт деуге келетін – эргопедагогикаға арналды.

Отырыс барысында Абай атындағы ҚазҰПУ зерттеуші профессоры Зульфия Мовкебаева арнайы педагогтарды инклюзивті-бағдарланған даярлау туралы баяндамасында қазіргі уақыттағы төрт негізгі қиындықты атап өтті. Олардың ішінде инклюзивті құзыреттіліктің болмауы, жалпы білім беретін мектепте балалармен жұмыс істеудегі қиындықтар, қажетті жабдықтар мен материалдардың болмауы, сондай-ақ қоғамның ерекше балаларға деген көзқарасы. Спикердің айтуынша, қоғам ерекше балаларды қабылдауға және қолдауға үнемі дайын емес.

Аталған проблемаларды шешу үшін Зульфия Мовкебаева практикалық қызметпен терең айналысуды қамтамасыз етуді, инклюзивті-бағдарланған оқу пәндерінің үлесін ұлғайтуды және түрлендіруді, дегенмен отандық жағдайды ескере отырып, оқу-әдістемелік қамтамасыз етуді ұсынды.

Ал балалар реабилитологиясында мамандар даярлау туралы С. Асфендияров атындағы ҚазҰМУ физикалық медицина, оңалту және спорттық медицина кафедрасының меңгерушісі Жанар Андасова айтып берді.

-Біз кадрларды даярлауда медициналық аспектіні енгізу қажеттілігін байқаймыз. Жоғары оқу орындарының түлектері қандай балалармен жұмыс істейтінін және олармен медицина тұрғысынан қалай нақты қарым-қатынас жасау керектігін түсінулері маңызды. Жалпы, медициналық оңалту – бұл көп іс-шаралар кешені. Оларға физикалық медицина және оңалту, кинезиотерапия, гидрокинезотерапия, дәрі-дәрмек терапиясы, БОС терапиясы, физиотерапия және т.б. жатады, — дейді ғалым.

Сонымен қатар, Абай атындағы ҚазҰПУ Педагогика және психология институтының директоры Ғалия Абаева РАС туралы, ал облыстық психикалық денсаулық орталығының неврология бөлімінің меңгерушісі Алтын Чиныбаева ерте араласудың маңыздылығы туралы авторлық баяндамаларын оқыды.

Секция соңында ШҚУ-дың Психология және түзету педагогикасы кафедрасының профессоры Светлана Стельмах қатысушыларға университеттің «Эргопедагогика» және «Ерте жастан қолдау педагогикасы» инновациялық білім беру бағдарламаларын таныстырды.

-«Ерте жастан қолдау педагогикасы» мамандығы Ғылым және жоғары білім министрлігінің бастамасымен «Педагогикалық білім беруді жаңғырту» жобасы шеңберінде әзірленді. Біздің түлектер 0-ден 3 жасқа дейінгі бүлдіршінге оның психофизикалық дамуының ерекшеліктерін ескеретін ең оңтайлы траектория бойынша дамуға көмектеседі. Эргопедагогикаға келетін болсақ, бұл педагогика, психология, медицина, түзету әсері және басқа да көптеген ғылыми бағыттарды қамтитын пәнаралық бағдарлама. Мұндай білімі бар түлектер тірек-қимыл аппараты бұзылған балаға жақсы қолдау көрсетеді. Ондай балаларға күнделікті тұрмыстағы қандайда бір істі бөгде адамның көмегінсіз орындауға үйрете алады, — дейді Светлана Стельмах.