ДИПЛОМ ТАБЫСТАУ КЕШІ-2024: ITжЖҒЖМ және БжҚЖМ

Гүл шоқтары, сыйлықтар мен жүздері бал-бұл жанған түлектер. IT және жаратылыстану ғылымдары жоғары мектебі мен Бизнес және құқық жоғары мектебінің түлектеріне дипломдарын табыстау кеші өтті.

Шараның салтанатты бөлігі Amanzholov University әнұранымен басталды. Әсем әнмен, ырғақты бимен жалғасты.

Ресми бөлім барысында оқу орыны ректоры Мұхтар Төлеген түлектер мен ата аналарды айтулы күнмен құттықтады.

Биыл 3000-нан астам түлек өз үлгісіндегі дипломдарын алады. Оның 305-і Бизнес және құқық жоғары мектебінің, 436-сы IT және жаратылыстану ғылымдары жоғары мектебінің түлектері. Университет өз спортшыларымен, шығармашылық байқаулар мен ғылыми жобалар жеңімпаздарымен мақтанады. ШҚУ 70 жылдан аса уақыт бойы еліміз үшін түрлі салада қызмет ететін 70 мыңнан астам түлек даярлады, — деп атап өтті ректор.

IT және жаратылыстану ғылымдары жоғары мектебінің деканы Салтанат Адиканованың айтуынша, биыл факультет “Үздік жоғары мектеп” атанып отыр.

Біздің түлектер университеттің қоғамдық және ғылыми қызметіне белсенді қатысты. Алғаш рет «Jastar time — 2024» облыстық фестивалінде біз үздік IT-жоба ретінде гран-приді жеңіп алдық. Сонымен қатар, 70-ке жуық студент бүгін үздік диплом алды, — дейді факультет деканы.

Бизнес және құқық жоғары мектебінің 20-дан астам студенті де қызыл диплом алды. Енді білікті жас мамандар мемлекеттік және жеке мекемелерге ресми түрде жұмысқа орналаса алады.

-Университетке, оқытушыларға тек рахмет айтамын. ШҚУ студенті атанғаныма бір күн де өкінген емеспін. Өсуге, сапалы білім алуға барлық мүмкіндік бар, — дейді түлек Магеш Бекасыл.

-Шара жоғары деңгейде өтті. Бүгінгі мереке, жарқын студенттік өмір үшін рахмет! Тек жақсылық тілеймін, — деп тілек білдірді Дильназ Мұрат.

Еске сала кетейік, жыл сайын Ertis Concert концерт алаңында диплом табыстау рәсімі өтеді. Алда ауқымды іс-шараның ГҒжм және Пжм түлектеріне арналған үшінші күні.