5 августа 2024
AMANZHOLOV UNIVERSITY: МЕМЛЕКЕТТІК БІЛІМ ГРАНТТАРЫНЫҢ ИЕГЕРЛЕРІ БЕЛГІЛІ БОЛДЫ
Бүгін елімізде мемлекеттік білім гранттарын тағайындауға арналған байқаудың қорытындысы белгілі болды. Таңертеңнен бастап болашақ Amanzholov University студенттері мен олардың ата-аналары ҚР Ғылым және жоғары білім министрлігінің ресми парақшаларында байқау нәтижелерін асыға күтті.
Естеріңізге сала кетейік, бұған дейін ведомствода 139 мыңға жуық талапкер шекті балл жинағаны айтылған болатын. Байқауға қатысу үшін барлығы 104 мыңнан астам өтінім берілді, бұл өткен жылмен салыстырғанда 10 мыңға көп.
Сағат 11-де ҚР ҒЖБМ мен Ұлттық тестілеу орталығының ресми сайттарында грант иегерлері тізімі жарияланды.
Үміткерлер арасында балл тең болған жағдайда басым құқығы бар 22 мыңнан астам талапкер бар. Атап айтқанда, «Алтын белгі» иегерлері, халықаралық және республикалық олимпиадалардың жеңімпаздары мен оқу үздіктері. Сонымен қатар, гранттарды бөлу кезінде әлеуметтік осал санаттағы балаларға арналған квоталар да ескерілді.
ШҚУ ректоры Мұхтар Төлеген білім беру гранты иегерлерін құттықтап, университет прогрессивті және табысты жастардың ұстаханасы екенін атап өтті.
— Жыл сайын бізге үздіктердің үздіктері оқуға түседі. Біздің университетті мықты спортшылар, жас ғалымдар, дарынды жастар таңдайды. Олар әрқашан оқуда озат, тәртіпте үлгілі. Барша грант иегерлерін алғашқы сәтті қадаммен құтықтаймын, — деді Мұхтар Әділбекұлы.
Енді Amanzholov University-ге түсушілерді келесі кезең — оқу жылына дайындық күтіп тұр. Айта кетейік, университетке қабылдау 25 тамызға дейін аяқталады.