ШҚУ-ДА БІЛІМ КҮНІ АТАП ӨТІЛДІ

С. Аманжолов атындағы ШҚУ-да жаңа оқу жылының басталуына орай бірінші курс студенттері үшін салтанатты жиын өтті. Мерекелік іс-шара барысында студенттерді алма-матердің бай тарихы мен дәстүрлерімен таныстырды, ал жоғарғы курс студенттері өз өнерлерін көрсетті.

Сонымен қатар, университет ректоры Мұхтар Төлеген үздік қызметкерлер мен білім алушыларды алғыс хаттармен және 150 000-нан 300 000 теңгеге дейінгі ақшалай сертификаттармен марапаттады. Марапатталғандардың қатарында қабылдау комиссиясының мамандары, үздік оқытушылар, «Алтын белгі» иегерлері мен талантты студенттер бар.

–Бүгін мен бірінші курс студенттерін құттықтап, алдағы жолдарыңызға үлкен жетістіктер тілеймін. Сіздер дұрыс таңдау жасадыңыздар, себебі ШҚУ соңғы бес жылда ғана білім алушылар санын 10 000 адамға дейін арттырды. Біздің түлектердің жұмысқа орналасу көрсеткіші 98%-ды құрайды. Қазіргі уақытта біз 100-ден астам білім беру бағдарламасын жүзеге асырып жатырмыз, – деді университет басшысы.

–ШҚУ-дың студенттер қатарын толықтыра отырып, мен университетіме бұрынғыдан да жақындай түстім. Мұнда алған тәжірибемнің болашақта өте пайдалы болатынына сенімдімін. Ректордың еңбегімізді бағалап, марапаттауы бізді одан әрі ынталандырады, – деді «Қазақ тілі мен әдебиеті» мамандығының студенті Әмина Жұмақан.

Айта кету керек, биыл университетке еліміздің әр өңірінен 2450-ден астам студент қабылданды. Олардың ішінде шамамен 1200 студент мемлекеттік грант иегері, 50-ден астамы «Алтын белгі» иегерлері мен халықаралық олимпиада жүлдегерлері, 70 спорт шебері мен спорт шеберлігіне үміткерлер, 26 халықаралық және республикалық жарыстардың жеңімпаздары бар.

Бірінші курс студенттері үшін Білім күні маңызды оқиғаға айналып, олардың табысты бастауына шабыт берді.