ШҚУ СТУДЕНТІ ТМД БОЙЫНША ҮЗДІК СТУДЕНТ АТАНДЫ

«Мемлекеттік және жергілікті басқару» білім беру бағдарламасының үшінші курс студенті Низамеддин Шыңғыс Ұлттық Инновациялық ғылыми-зерттеу орталығы ұйымдастырған «ТМД-ның үздік студенті-2024» халықаралық байқауында бірінші дәрежелі дипломмен марапатталды.

Низамеддиннің жетістікке жетуге деген ұмтылысы мектеп кезінен басталды. Ол білімнің жаңа мүмкіндіктерге жол ашатын кілт екеніне сенді және бұл сенім оған жоғары мақсаттарды қоюға көмектесті.Университетке түсу оның жаңа шыңдарға жетудегі алғашқы қадамы болды. Низамеддин қоғамдық жобаларға белсене қатысып, өзінің білім алып жүрген жоғары мектебінің дамуына үлес қосуға ұмтылды.

– Мен ғылыми конференцияларға және студенттік іс-шараларға белсене қатыстым. Бұл маған білімімді кеңейтуге және оны тәжірибеде қолдануға мүмкіндік берді. Өмірімдегі ең есте қаларлық жетістіктердің бірі – Азия чемпионатында жүлделі орын алу болды. Менің жетістігімде мені қолдаған оқытушылар, университет басшылығы, достарым мен отбасымның рөлі зор, – дейді Низамеддин.

Оның айтуынша, ТМД бойынша үздік студент атағы соңғы мақсат емес, жаңа жетістіктерге жол ашатын бастама. Болашақта ол үлкен саясатта мансап құруды жоспарлап отыр.