БОЛАШАҚ ЯДРОЛЫҚ ФИЗИКА ЖӘНЕ ХИМИЯ МАМАНДАРЫНА ЭКСКУРСИЯ ӨТТІ

ШҚУ академиялық саясат және білім беру бағдарламаларын басқару департаменті №8 оқу ғимаратында студенттерге экскурсия ұйымдастырды. «Ядролық физика және атом энергетикасы», «Химия және наноматериалдар» білім беру бағдарламасының 20-дан астам екінші курс білім алушылары Ұлттық ғылыми зертхананың материалдық-техникалық базасымен танысты. Кіші ғылыми қызметкер Нариман Қайырбеков ғылыми зерттеулерді жүзеге асыратын замануи жабдықтар мен зертхананы көрсетті. Атап айтқанда, текстуралық анализатор, наносайзер, оптикалық микроскоп, потенциостат сынды құралдарды таныстырды.
Нариман Қайырбековтың сөзінше, зерттеумен айналысқысы келетін болашақ ғалымдар студент кездерінен бастап Ұжымдық пайдалану ұлттық ғылыми зертханасында өз сынамаларын жүргізе алады.

— Қазіргі таңда ядролық физика, химия мамандарына сұраныс артып отыр. Біз білім беру бағдарламасының негізінде елге білікті кадрлер дайындауға бірнеше жылдан бері көңіл бөліп келеміз. Студенттерді қызықтыру мақсатында тәжірибе базаларына бірнеше экскурсия жасадық. Алдағы уақытта ҚР Ұлттық ядролық орталығында, «ҮМЗ» АҚ кәсіпорынында кездесулер жоспарланған, — деді оқу-әдістемелік жұмысты ұйымдастыру бөлімінің жобалық кеңсесінің басшысы Айнұр Қозыбаева.