СТУДЕНТТЕР НАШАҚОРЛЫҚҚА ҚАРСЫ

С. Аманжолов атындағы Шығыс Қазақстан университетінде ШҚО Полиция департаментінің есірткі қылмысына қарсы іс-қимыл басқармасының қызметкерлерімен бірлесіп «Студенттер есірткіге қарсы» атты іс-шара өтті. Бұл шараға Парижде өткен 2024 жылғы Паралимпиада чемпионы Ақмарал Науатбек те қатысты.

Іс-шараның басты мақсаты — есірткіге қарсы түсіндіру жұмыстарын жүргізу, студенттер арасындағы ынтымақтастықты нығайту және осы күресте бір-біріне қолдау көрсету.

Іс-шара ШҚУ ректоры Мұхтар Төлегеннің сөзімен басталды:

— Бүгінгі кездесудің тақырыбы әрқайсымыз үшін маңызды. Өкінішке орай, соңғы жылдары жастар арасында есірткі қолданудың өсуі байқалады, және бұл жағдай біздің жедел әрекет етуімізді талап етеді. Университетте алдын алу бағдарламалары әзірленіп, психологиялық қызметтер жұмыс істейді. Сонымен қатар, есірткіге қарсы күреске арналған үнемі түсіндіру шаралары өткізіліп тұрады, — деді ректор Мұхтар Төлеген.

Ақмарал Науатбек те шарада сөз сөйлеп, мәселенің өзектілігін атап өтті:

— Спортшы ретінде мен жетістікке жету үшін еңбек, табандылық және денсаулық қажет екенін білемін. Есірткі тек осының барлығын бұзады. Бір-бірімізге қолдау көрсетейік, бірге біз болашақ ұрпақ үшін жарқын болашақ құра аламыз, — деді Ақмарал Науатбек.

Шара соңында ШҚО Полиция департаментінің қызметкерлері жастарға ақпараттық-түсіндіру жұмыстарын жүргізді. Олар Қазақстанда есірткімен ұсталған қылмыскерлерді 20 жылға дейін бас бостандығынан айыру жазасының күтіп тұрғанын мәлімдеді.