ҒЫЛЫМИ КІТАПХАНАДАҒЫ ЖАҢА КОВОРКИНГ-ОРТАЛЫҚТЫҢ ТҰСАУКЕСЕРІ

С.Аманжолов атындағы Шығыс Қазақстан университетіндегі Бейбіт Мамраев атындағы ғылыми кітапханада орналасқан жаңа коворкинг-орталықтың тұсаукесері өтті.

Іс-шараның ерекше қонағы мемлекет және қоғам қайраткері, VI шақырылған Қазақстан Республикасы Парламенті Мәжілісінің депутаты, Әлеуметтік-мәдени даму комитетінің төрағасы, ғылым докторы, профессор және Еуразия Халықаралық экономикалық академиясының, сондай-ақ Қазақстанның Педагогика Ғылымдары Академиясының академигі Бейбіт Мамраев болды. Оның есімін 2022 жылы университеттің 70 жылдық мерейтойында ғылыми кітапхана иеленген. Тұсаукесер барысында ол мұндай кеңістіктің оқу процесі үшін маңыздылығын атап өтті.

 — Кітапхана тек кітап сақтайтын орын емес. Ол білім, идеялар мен қарым-қатынас орталығына айналуы керек. Біз технология дәуірінде өмір сүріп жатырмыз. Заманауи жабдықтар оқу мен жұмыс үшін бірегей атмосфера жасауға мүмкіндік береді, — деді Бейбіт Мамраев.

Бүгінде кітапхана жұмыс істеуге ыңғайлы әрі көпфункционалды коворкинг орталығына айналды. Ойланып жұмыс істеуге арналған тыныш бұрыштар және бірігіп отыруға арналған ашық кеңістіктер  бар.

Оқу, зерттеу және шығармашылық ізденіс үшін жаңа компьютерлер, ыңғайлы жұмыс орындары және әдебиеттің мол қоры үйлесімді жағдай жасайды.