ШҚУ СТУДЕНТТЕРІ ҚР МЕН ТҮРКІ ХАЛЫҚТАРЫ АРАСЫНДА ҮЗДІК ДЕП ТАНЫЛДЫ

 С.Аманжолов атындағы Шығыс Қазақстан университетінің «Журналистика» білім беру бағдарламасының 3-курс студенті Әмина Бақытбекова республикалық байқауда 1-дәрежелі дипломммен, «Түркі халықтарының үздік студенті» мүсіншесі және төсбелгісімен марапатталды. Сондай-ақ, «Қазақ тілі мен әдебиеті» білім беру бағдарламасының 3-курс студенті Ару Қасаинова «ҚР үздік студенті» номинациясы бойынша 1-дәрежелі диплом иеленді.

Байқауды ҚР «Bilim-Orkenieti» ұлттық инновациялық ғылыми-зерттеу орталығы ұйымдастырды. Марапаттау салтанаты «Әділетті Қазақстанның тірегі — адал жастар» форумының аясында өтті.

— Университет қабырғасында қоғамдық жұмыстарға белсене қатысқаным үшін осындай марапатқа ие болу мен үшін үлкен мәртебе. Алдағы уақытта да университеттегі шараларға белсене қатысып, жаңа жобаларды іске асыруға дайынмын, — деп атап өтті С.Аманжолов атындағы ШҚУ студенті Әмина Бақытбекова.

— Байқауда Қазақстанның әр облысынан және ең үздік университеттерінен келген мықты студенттер қатысты. Менің ойымша, бұл марапат әр студенттің арманы. Оқу ордамда оқыған үш жыл ішінде мен түрлі жарыстар мен байқауларға белсене қатысып, спортпен айналысып, қоғамдық қызметке араластым. Еңбегімнің ақталғанына қуаныштымын. Бұл марапат менің болашақтағы жетістіктерімнің тек шағын бөлігі болатынына сенемін, — деді «ҚР үздік студенті» республикалық байқауының жеңімпазы Ару Қасаинова.

Айта кету керек, Амина мен Ару университет қабырғасында белсенді және талапты студенттердің бірі. Амина көптеген медиа жобалардың және подкасттардың авторы, Гуманитарлық ғылымдар жоғары мектебінің өзін-өзі басқару «Парламент» ұйымының төрағасы. Ару, өз кезегінде, университеттің мобилографы ретінде жұмыс істеп, студенттік жобалар үшін медиа-материалдар дайындайды. Сонымен қатар, ол университеттегі түрлі конкурстар мен жарыстардың белсенді қатысушысы.