МЮНСТЕР МУЗЫКА УНИВЕРСИТЕТІНІҢ ПРОФЕССОРЫ ШҚУ-ҒА АЛҒЫСЫН БІЛДІРДІ

Германияның Мюнстер музыка университетінің профессоры Штефан Фроликс осы ЖОО-ның студенттері скрипкашы Хенрике Бликслагер және виолончельші Леонард Кюлиенің Өскеменге сапары барысында қолдау білдіріп, концерттік турдың жоғары деңгейде өтуіне үлес қосқан С.Аманжолов атындағы ШҚУ-ға алғысын білдіріп, хат жолдады.

Профессор Штефан Фроликс С.Аманжолов атындағы Стратегиялық даму және халықаралық қатынастар жөніндегі проректор Ирина Ровняковаға, Сапаны қамтамасыз ету және халықаралық ынтымақтастық департаментінің директоры Динара Сапароваға, Стратегия, халықаралық ынтымақтастық және аккредиттеу бөлімі басшысының міндетін атқарушы Дана Ниғмановаға шетелдік студенттерді қолдап, ілтипат көрсеткендері үшін алғыс білдірді.

Хатта Мюнстер музыка университетінің өкілдері өнерпаз студенттермен кездесу ұйымдасытырып, Германиядағы білім беру бағдарламасы мен оқу барысына қызығушылық танытқандарына ерекше алғыс білдірді. С.Аманжолов атындағы ШҚУ-дың қонақжайлығы мен қолдауының арқасында Қазақстан бойынша өткен  «Трио Галатея» триосының туры сәтті өткенін айтты. Біз әрі қарай серіктестік мен мәдени байланыс арта түседі деп сенеміз делінген алғыс хатта.

Еске салайық, Қазақстанның әртүрлі қалаларында ауқымды концерттік тур ұйымдастырған ШҚУ-дың түлегі дарынды пианист Олжан Қостубаев Өскеменге германиялық музыкант достарын бірге ала келген еді. Сергей Рахманиновтың авторлығымен жазылған фортепиано, скрипка және виолончельде орындалатын классикалық жауһарларды орындап Қазақстан халқын тәнті етті.

Германиялық студенттерге қонақжайлық танытқан С.Аманжолов атындағы ШҚУ жас өнерпаздарды екі аптаға жатақханаға жайғастырып, өнерлерін көрсетуге мүмкіндік берді. Музыкалық білім беру бағдарламасының студенттерімен, №1 балалар музыка мектебінің оқушыларымен және оқытушылармен кездесу ұйымдастырды.