AMANZHOLOV UNIVERSITY СТУДЕНТІ «ТМД-НЫҢ ҮЗДІК СТУДЕНТІ» АТАНДЫ

С.Аманжолов атындағы ШҚУ-дың  “Информатика мұғалімдерін даярлау” мамандығының 3 курс студенті Анель Көпжасарова «BILIM-ORKENIETI» ұлттық инновациялық ғылыми-зерттеу орталығы және «Жаңа Қазақстан» инновациялық орталығы ұйымдастыруымен өткен байқауда “ТМД-ның үздік студенті” төсбелгісімен және  “Түркі халықтарының үздік студенті” I дәрежелі дипломымен және статуэткасымен марапатталды.

Анель Көпжасарова бұл байқауға ғылыми жетекшісі Акмарал Жақсылықовамен бірге “7 жастағы балаларды инклюзивті оқытуда LEGO Education WEDO 2.0 робототехникалық кешенін STEM білім беру аясында қолдану” атты өзекті тақырыпты таңдаған.

— Марапатқа ие болғанда қуаныш пен мақтаныш сезімін қатар сезіндім. Осы уақытқа дейін еткен еңбегімнің еленгеніне ризамын. Бұл марапат арқылы мемлекетіміздің жастарға деген қолдауын сезіндім, — деді Анель Көпжасарова.

Үздік студент осы уақытқа дейін университеттің белсенді өмірімен қатар ғылыми жобаларға да аса мән берген. “Заманауи әлемдегі IT технологиялар” ғылыми мақалалар жарысында 2 орын, жемқорлыққа қарсы мәдениетті қалыптастыру мақсатында ұйымдастырылған “AntiParaCraft-2024” байқауында 2 орын иеленген. Сонымен қатар, 1-2 курста “Информатика мамандығының үздігі” атанған.  Ол 2023 жылдың желтоқсанында StartUp жобалар жарысында 3 орынды иеленіп, қазір осы жоба нәтижесінде сабақтан тыс уақытта оқушыларға робототехникадан сабақ береді.

Талабы биік студент болашақта магистратураға оқуға түсіп, робототехника саласын терең зерттегісі келеді.