МАМАНДЫҚ ТАҢДАУ – МАҢЫЗДЫ ҚАДАМ

Amanzholov university базасында «Зерделі» ақыл-ой дамыту мектебімен арадағы меморандум аясында қала мектептерінің бітіруші сынып оқушыларына арналған «мамандық таңдау – маңызды қадам» атты ауқымды іс-шара өтті.

Көрме залында оқушыларға әртүрлі білім бағдарламаларының мамандары түсіндіру жұмыстарын жүргізіп, кеңестерін берді. «Professional Upgrading» мансап орталығының жетекшісі мамандық таңдауға бағыт-бағдар беретін мұндай шаралар жылына бірнеше мәрте өткізілетін айтты.

— Бұл шара оқушыларға мамандық таңдауда дұрыс шешім шығаруға оң әсерін тигізеді. Оқушылар қызығушылық танытып, сұрақтарына жауап алуда. Түлектерге таңдаудан сүрінбей, ҰБТ-дан жоғары бал алуларына тілектеспін. — деді «Professional Upgrading» мансап орталығының жетекшісі Жаннель Болатова.

Қабылдау комиссиясының жетекшісі Ләйлә Байжұманова С.Аманжолов атындағы ШҚУ-дың білім бағдарламалары жөнінде толық ақпарат беріп, ШҚО-дағы үздік университеттің артықшылқтары мен соңғы жылдардағы жетістіктерін атап өтті. Студенттерге жасалатын мүмкіндіктер, оқу процессінің жаңашылдығы, ғылыми орталықтардың, зертханалардың озық технологиялармен жабдықталғанын баяндады. Университеттің негізі бағыты – сапалы білім мен тәжірибеге негізделген оқу процесі екені баса айтылды.

— Бүгінгі шарада әр білім беру бағдарламасының жетістіктерін көрсететін көрмеден көп ақпарат алдым. Бірнеше күн бұрын ШҚУ-дағы зертханалардың бірінде, ғылыми жетістіктердің куәсі болдым. Болашақта құқықтану саласында жоғары білім алмақпын. Маған осы С.Аманжолов атындағы ШҚУ-дың білім беру бағыты ұнайды, — деді шара қатысушысы Камшат Алипбаева.

«Зерделі» ақыл-ой дамыту мектебінің өкілдері қаланың әр мектебінен жиналған 300-ге жуық оқушыларға ҰБТ-ға дайындалу картасының сызбасын, мамандықтық таңдаудың жолдарын түсіндірді. Шара соңында тест тапсырмаларын ойнатып, Астанаға тур, Дубай қаласына жолдама табыс етті.