ШҚУ-ДА » БІРІНШІ КУРС ТАЛАНТТАРЫ » БАЙҚАУЫ ӨТТІ

Amanzholov University — де көптен күткен оқиғалардың бірі- «Бірінші курс таланттары 2024″байқауы өтті. Бұл жарқын іс-шара әртүрлі жоғары мектептердің студенттерін жинап, олардың таланттары мен шығармашылық қабілеттерін көрсетті. Бұл мереке жастардың шығармашылығы мен бәсекелестік рухын біріктіріп, жаңа қырларын ашты.

Байқаудың шымылдығын IT және жаратылыстану ғылымдары жоғары мектебінің студенттері ашты. Олар көрермендерді ерекше заманауи биімен таң қалдырып, патриоттық рухты көтеретін қойылым ұсынды. Сондай-ақ, «Қара пима» спектаклінен алынған үзінді көрермендерді ойландырып, әрбір әрекеттің өз салдары болатынын жеткізді.

-Біздің қойылым жоғары деңгейде өтті.  Жалпы дайындыққа көп күш жұмсадық, бірақ біз  лайықты нәтиже көрсеттік деп ойлаймын. Заманауи би менің күткенімнен де асып түсті. Әлі ерекше әсердемін,- – деп бөлісті IT және жаратылыстану ғылымдары жоғары мектебінің белсендісі Али Тойғанбаев.

Педагогика жоғары мектебінің студенттері көрермендерді әуезді вокалдық өнерімен, «Тәуелсіздік тарихы» атты патриоттық көрінісімен және бағдарламаның ерекше бөлігіне айналған «Құдаша» музыкалық спектаклімен тәнті етті. Сонымен қатар, олардың кәсіби бағдар бейнеролигі көрермендердің жүрегіне жол тауып, ерекше ықыласқа ие болды.

– Бұл көптен күткен іс-шараға екі айдан астам уақыт дайындалдық. Бұл қиын да қызықты болды. Біз оған бар күшіміз бен шығармашылық қуатымызды салдық, енді барлық еңбегіміздің нәтижесін көру сәтін тағатсыздана күтіп жүрмін, – дейді педагогика Жоғары мектебінің студенті Алан Мерғазы.

Кешті гуманитарлық ғылымдар жоғары мектебінің белсенділері түйіндеді. Олар өздерінің қойылымдарын бір оқиға желісімен өрбітті. Ерекше шығармашылық көзқарас пен терең мазмұн көрермендерді таң қалдырды. Сонымен қатар, студенттер қонақтарды Финляндияның патриоттық нөмірімен және халық билерімен қуантты. Осылайша көрермендерді Солтүстік мәдениетіне енді.

– Сахнада өнер көрсеткенде, жүрегім толқып, ерекше мақтаныш сезімін бастан өткердім. Университетіме осы мүмкіндікті сыйлағаны үшін алғысымды білдіремін, – дейді гуманитарлық ғылымдар Жоғары мектебінің студенті Дамиля Темірханова.

Бұл дәстүрлі шара тағы да Amanzholov University-дің тек білім беру орталығы ғана емес, сонымен қатар жастардың мәдени-рухани дамуына жағдай жасайтын мекеме екенін дәлелдеді. Осындай іс-шаралар студенттерді жаңа жетістіктерге шабыттандырып, оларды шығармашылық шыңдарға жетелеуде маңызды рөл атқарады.