ҚАЙСАРЛЫҚ ПЕН ӨЗІНЕ СЕНІМІ — ШҚУ СПОРТШЫСЫНЫҢ ЖЕТІСТІККЕ ЖЕТУ ҚҰПИЯСЫ

Жеңіл атлетика – тек жарыстар мен жаттығулар ғана емес. Бұл – өз-өзіңді жетілдірудің қиын жолы, табандылық пен ерік-жігерді талап ететін сала. Amanzholov University студенті Варвара Дмитриева күнделікті жаттығулар мен қиындықтарды жеңу тұлғаның мінезі мен өзіне деген сенімділігін қалай қалыптастыратыны туралы әңгімелейді. Варвара үшін жеңіл атлетика жай ғана әуестік емес, өмір салтына айналған, ол оны алға жылжуға және кез келген қиындықтарды жеңуге шабыттандырады.

Сіз спорттағы жолыңызды қалай бастадыңыз?

– Мен шамамен 12 жаста едім. Құрбым әртүрлі үйірмелерді байқап жүрген, мен оған серік болуды шештім. Бір күні біз жеңіл атлетика манежіне келдік. Сол күн менің спорт жолымның бастауы болды. Мен жеңіл атлетикамен 7 жылдан бері айналысамын.

Неліктен жеңіл атлетиканы таңдадыңыз?

Бұл жеңіл атлетикадағы ең қызықты пәндердің бірі деп санаймын. Әр элемент – жүгіру, секіру фазалары мен қону – өте әсерлі. Әсіресе, жақсы нәтиже көрсеткеннен кейінгі сезімдер ерекше ұнайды. Бұл өзіңе деген мақтаныштың керемет сезімі.

Сіз өз жолыңыздағы қиындықтарды қалай жеңесіз?

— Менің жолымда физикалық және психологиялық қиындықтар болды. Кейде спортты басқа міндеттермен қатар алып жүру қиынға соқты. Бірақ ең бастысы – қолды бір сілтемей, алға ұмтылу. Табандылық пен өз-өзіне деген сенім әрдайым көмектеседі.  

Варвара үшін физикалық шаршаумен күресудің құпиясы қарапайым: толық ұйқы, дұрыс тамақтану және массаж. Ал эмоционалды күйзелістен кітап оқу, сурет салу және сүйікті фильмдерді көру көмектеседі.

Жарыстар туралы сөз қозғағанда, Варвара жарыс алдында әрқашан уайымдайтынын мойындайды, бірақ бұл толқу оған жиналуға көмектеседі. 

— Спорт алаңына шықпас бұрын мен тыныс алу гимнастикасына жүгініп, кіруді мінсіз орындап жатқанымды елестетемін. Сондай-ақ маған көңілді шұлықтар көмектеседі – олар мені керемет көңіл-күймен қуаттандырады, – дейді спортшы.

Сіздің спорттық мансабыңыздағы ең жарқын сәт қандай болды?

– Бұл менің облыс деңгейіндегі алғашқы жарыстарым еді. Мен қатты қобалжыдым, себебі жақсы нәтиже көрсеткім келді. Нәтижесінде екінші орын алдым, бұл керемет сезім болды! Сол кішкентай жеңіс менің мансабымның бетбұрысты сәтіне айналды.

Жаттығудан бос уақытыңызда немен айналысасыз?

– Бос уақытымда кітап оқығанды ұнатамын. Әсіресе, фантастика жанрын жақсы көремін. Кейде көңілімді көтеру үшін қысқа әңгімелер жазамын. Сонымен қатар жақын адамдарыммен уақыт өткізгенді ұнатамын, бұл маған күш-қуат береді.

Варвара атап өткендей, болашақ спортшыларға басты кеңесі-өз-өзіңе сену. 

– Жетістік бірден келмейді, қателіктер – оқу процесінің бір бөлігі.  Жаттығудан ләззат алыңыз, қозғалыста қуаныш табыңыз. Жеңіл атлетика-бұл тек жарыстар мен үздік көрсеткіш қана емес, сонымен қатар жетістікке жету жолындағы қуаныш.  Оқу процесінің әр кезеңінде рахат табу өте маңызды, содан кейін нәтиже көп күттірмейді,- дейді бойжеткен.

Варвара Дмитриеваның жеңіл атлетика әлеміне апаратын жолы-құштарлық пен еңбекқорлықтың үлкен жетістікке жетуінің жарқын мысалы. Оның жеке тарихы әр адамның ішкі күшінің маңыздылығын көрсетеді.