AMANZHOLOV UNIVERSITY «UI GREEN METRIC WORLD UNIVERSITY» РЕЙТИНГІНДЕ 13-ОРЫНҒА ИЕ БОЛДЫ

С.Аманжолов атындағы Шығыс Қазақстан университеті «UI Green Metric World University» халықаралық рейтингіне қатысқан 1000  жоғары оқу орнының қатарына еніп, қазақстандық ЖОО арасында ШҚУ 28 университеттің ішінен 13-орынға ие болды. Рейтингтің басты мақсаты – тұрақты даму, әлеуметтік әл-ауқат, әлеуметтік және мәдени жүйелердің тұрақтылығын сақтау, сондай-ақ биологиялық және физикалық табиғи жүйелердің тұтастығын қамтамасыз ету.

Рейтингке әлемнің 1500 жоғары оқу орны қатысты, олар бойынша қоршаған ортаға кері әсерді азайту мақсатында орнықты дамудың стратегиялық жоспары мен бақылауға баға беріледі.

Университет «Қоршаған орта және инфрақұрылым», «Энергия және климаттың өзгеруі» санаттарында жоғары балл жинады.

– Соңғы жылдары университеттің инфрақұрылымы айтарлықтай жаңартылды. Атап айтқанда, оқу-материалдық база, студенттік үйлері, ғылыми зертханалар, «DANA BALA» үздіксіз және инклюзивті білім беру орталығы, «Сібе» оқу-тәжірибе базасы, Панкратьев бағы және т.б. Бұл жетістіктер ШҚУ-дың «UI Green Metric World University» рейтингіне кіруіне мүмкіндік берді. Сондай-ақ, университет кампусының көгалдандыру жұмыстары, аймақтың флорасы мен фаунасын сақтауға бағытталған іс-шаралар да жоғары бағаланды, – деді ШҚУ ректоры Мұхтар Төлеген.

С.Аманжолов атындағы университеттің Green Metric рейтингіне кіруі оқу орнының тұрақты даму қағидаттарына адалдығын, экономикалық, азық-түлік қауіпсіздігі мен табиғи өзгерістерге байланысты зерттеулерге ерекше көңіл бөлетінін көрсетті.