«АЛТАЙТАНУ» ҒЗО ДИРЕКТОРЫНЫҢ МОҢҒОЛИЯҒА ІС-САПАРЫ

Сәрсен Аманжолов атындағы Шығыс Қазақстан университеті, «Алтайтану» ғылыми зерттеу орталығының директоры, PhD доктор Майра Тарлаубай Моңғолия елінде іс-сапарда болып қайтты.

Іс-сапар барысында PhD доктор Майра Тарлаубай Моңғолияның Баян-Өлгей аймағында бірнеше келелі кездесулер өткізді.

Баян-Өлгей аймағының әкімі Заңғар Есентайұлының қабылдауында болып, білім саласы бойынша кейбір мәселелерді талқылады. Кездесу барысында әкім басты мақсатының бірі Баян-Өлгейдің білім саласына жаңа дем беру екендігін атап өтті.

Моңғолия Ұлттық Білім университетінің Баян-Өлгей аймағындағы филиалының  директорының орынбасары Тойбазар бастаған өкілдерімен кездесу өткізілді.  Кездесу барысында Сәрсен Аманжолов атындағы Шығыс Қазақстан университеті және Моңғолия Ұлттық Білім университетінің Баян-Өлгей аймағындағы филиалымен бірге болашақта жұмыс жасау сөз етілді.

Баян-Өлгей аймағының рухани қазынасы Ақтан Бабиұлы атындағы орталық кітапханасының басшысы Алтынгүл Дәлелқызымен болашақта Сәрсен Аманжолов атындағы Шығыс Қазақстан университеті кітапханасымен бірлесіп жұмыс істеу жоспарланды.

Жазушы, шежіре таратушы Дүниежүзі қазақтары құрылтай мен «Отандастар» қорының Баян-Өлейдегі өкілі, Қазақ Қаламгерлер кеңсінің төрағасы  Хабсатар Омарұлы, Баян-Өлгейдегі Алтайтану орталығының директоры, профессор, доктор Улагван Бекет, Шұғыла журналының бас редакторы, Моңғолия Журналистер Біріккен Одағының Баян-Өлгей аймақтық басшысы Еркінбек Бөденұлымен екі ел арасындағы академиялық байланыстар сөз етілді.

Майра Шүршітбайқызы Моңғолия Алтай жартас кескіндеме кешенін қорғау басқармасының басшысы Өмірбек Биқұмарұлының қабылдауында болып, Монғол Алтайы мен Кенді Алтай арасындағы ғылыми байланыс жайлы деректер талқыланды.

Сондай-ақ «Алтайтану» ғылыми зерттеу орталығының директоры Баян-Өлгей аймағында орналасқан кейбір орта мектептердің 11-12 сынып оқушыларына  кәсіби бағдар беру жұмыстарын жүргізді.