31 декабря 2024
ШҚУ РЕКТОРЫНЫҢ ЖАҢА ЖЫЛМЕН ҚҰТТЫҚТАУЫ
Құрметті достар! Әріптестер! Серіктестер! Отандастар!
Санаулы сағаттардан кейін Жаңа жыл төрімізге енгелі тұр. Биылғы жыл ғылым саласынан бастап халықаралық аренадағы беделді арттыратын табыстарға толы жыл болды.
Өңірлік жобалық «Серпін» кеңсесінің жұмыс өнімділігін арттыруға ерекше көңіл бөлінді. Жоба іске асып жатқан 10 жылдың ішінде 1500-ге жуық студент білім алып, жұмысқа орналасты. Сонымен қатар, ҚР Премьер-министрінің орынбасары Тамара Дүйсенова теңдей білім алуға мүмкіндік беретін ШҚУ-дың инклюзивті әзірлемелерін жоғары бағалады. Университет базасында ғылым мен инновацияны дамыту мақсатында «Shygys Bastau» технопаркі ашылды. ҚР Ғылым және жоғары білім министрі Саясат Нұрбектің қатысуымен ашылған орталық ғылыми жобалар мен стартаптарды жүзеге асыратын алаңға айналды. Сол күні министрге тең білім алуға мүмкіндік беретін инклюзивті мектеп таныстырылды.
Біздің жетістіктеріміз халықарлық деңгейде де елеусіз қалмай, лайықты бағасын алды. Amanzholov University халықаралық QS Stars Rating System рейтингінде «4 жұлдыз» белгісін иеленді. Бұл халықаралық білім беру стандартына сәйкес келетінімізді көрсетеді. Біз әлемдік UI Green Metric World University рейтингінде 13 орынға тұрақтап, Webometrics халықаралық рейтингінде 47 орынды иелендік.
Әлемнің жетекші, беделді университеттерімен серіктестік аясы кеңейіп, бірлескен зерттеу жұмыстары жүзеге асырылуда. Биыл Италия, Корея, Польша, Қытай және басқа да алыс-жақын шетелдермен тығыз жұмыс істеп жатырмыз. Университет әлемнің 150-ден астам жоғары оқу орнымен ынтымақтастық келісім аясында жұмыс істеп келеді. Сондай-ақ, Италия елімен серіктестігімізді көрсететін Сальваторе Квазимодо атындағы Итальян тілдері мен мәдениеті орталығының ашылуы біз үшін мақтанарлық жайт.
Осы жылы ШҚУ педагогтер командасы балаларды мектепке дайындаудың кешенді әдістемесіне авторлық құқық алды. Біз осы күнге дейін Республикадағы мектеп, колледж және жоғары оқу орындарында кадрлық резервті толықтыратын жаңашыл мұғалімдердің бір емес бірнеше буынын дайындағанымыз баршаңызға аян. Сондықтан бұл да мектептегі білім саласының дамуына қосқан үлесіміздің бір көрсеткіші. Сонымен қатар, біздің студенттер университетіміздің абыройын әр салада қорғап жүр. ШҚУ студенті Бағым Балтабаева «Мисс Қазақстан – 2024» мәртебесін иеленіп, Amanzholov University жастарының жарқын жетістігінің үлгісі болды.
ШҚУ-дың ғылыми қызметкерлері беделді республикалық байқаулардың жеңімпазы атанып, халықаралық рейтингтердегі көрсеткішімізді айтарлықтай жақсартты. Amanzholov University-дегі «Беттік инженерия және трибология» ҒЗО-ның аға-ғылыми қызметкері Меруерт Маулет «Жас ғалым» бағдарламасы аясында гранттық қаржыландыруды жеңіп алды. Ол «NiCrAl негізіндегі детонациялық жабындардың қорғаныс қасиеттерін арттыру» жұмысын ұсынды.
Жыл көлемінде С.Аманжолов атындағы Шығыс Қазақстан университетінің басым бағыттарын дамытуға үлес қосқан ұжымның әр қызметкеріне алғыс білдіремін!
Келер жылда университеттің беделін арттыратын, жетістіктерін молайтатын жыл болатынына сенемін. Бағындырған шыңдарымыз одан да биік жетістіктерге жетуге ықпал етсін. Жаңа жыл университетке, әріптестерімізге тек жақсылық әкелсін! Әрқайсыларыңызға денсаулық, бақыт тілеймін! Арман, мақсаттарыңыз орындалып, отбасыларыңызда тек қуаныш болсын!
Жаңа жыл құтты болсын!