ШҚУ-ДА ОЛИМПИАДА ОЙЫНДАРЫНЫҢ ЖЕҢІМПАЗЫ ДЕМЕУ ЖАДЫРАЕВ

С. Аманжолов атындағы Шығыс Қазақстан университетінің қабырғасында Қазақстанның грек-рим күресінің балуаны, Париждегі 2024 жылғы Олимпиада ойындарының күміс жүлдегері Демеу Жадыраевты қарсы алды.

-Бүгін университетімізде ерекше оқиға орын алды. С. Аманжолов атындағы Шығыс Қазақстан университетінің қабырғасында Қазақстанның грек-рим күресінің балуаны, Париждегі 2024 жылғы Олимпиада ойындарының күміс жүлдегері Демеу Жадыраевты, оның жаттықтырушысы әрі тәлімгері Боранбек Қоңыратовты және Өскемен қаласының әкімі Жақсылық Омарды құрметпен қарсы алдық. Жақсылық Омар бұл кездесуді ұйымдастыруда үлкен қолдау көрсетті,- деді ШҚУ ректоры Мұхтар Төлеген.

Іс-шара барысында университетіміздің студенттері мен спортшылары қызықты сұрақтарын қоюға тамаша мүмкіндік алды. Демеу Жадыраев өзінің мансабы мен Олимпиада ойындарындағы ең қиын сәттері туралы айтып, жас спортшыларға пайдалы кеңестер берді. Сонымен қатар, студенттер балуанға өз таңданыстарын білдіріп, оған өлең арнады.

Кездесу соңында Мұхтар Төлеген Демеу Жадраевқа Қабанбай батыр атындағы медальды табыстады.