ШҚУ-ДЫҢ ЖОҒАРЫ КОЛЛЕДЖІНДЕ БІЛІМ КҮНІ АТАП ӨТІЛДІ

С. Аманжолов атындағы ШҚУ-да жаңа оқу жылының басталуына орай бірінші курс студенттері үшін салтанатты жиын өтті. Мерекелік іс-шара барысында студенттерді алма-матердің бай тарихы мен дәстүрлерімен таныстырды, ал жоғарғы курс студенттері өз өнерлерін көрсетті.

Сонымен қатар, университет ректоры Мұхтар Төлеген үздік қызметкерлер мен білім алушыларды алғыс хаттармен және 150 000-нан 300 000 теңгеге дейінгі ақшалай сертификаттармен марапаттады. Марапатталғандардың қатарында қабылдау комиссиясының мамандары, үздік оқытушылар, «Алтын белгі» иегерлері мен талантты студенттер бар.

–Бүгін мен бірінші курс студенттерін құттықтап, алдағы жолдарыңызға үлкен жетістіктер тілеймін. Сіздер дұрыс таңдау жасадыңыздар, себебі ШҚУ соңғы бес жылда ғана білім алушылар санын 10 000 адамға дейін арттырды. Біздің түлектердің жұмысқа орналасу көрсеткіші 98%-ды құрайды. Қазіргі уақытта біз 100-ден астам білім беру бағдарламасын жүзеге асырып жатырмыз, – деді университет басшысы.

Университетімізбен бірге өткізілген іс-шарадан кейін, әр топта «Адал адам – Адал еңбек – Адал табыс» танымдық кураторлық сағатын өткізді. Тәрбиелік сағат барысында балалардың жүрегіне нұр сеуіп, алдағы уақытта атаулы құндылықтармен жұмыс жасай отырып, толық адам тәрбиелеп шығатынымызға сенімдіміз… Оқу жылына сәттілік тілейміз!