ҚР ҒЖБМ МИНИСТРІ САЯСАТ НҰРБЕК ШҚУ ПРОФЕССОРЫН МАРАПАТТАДЫ

Бүгін «CONNECTED 2024: REIMAGINING THE FUTURE» конференциясының аясында биология кафедрасының қауымдастырылған профессоры Гүлназ Садықанова ҚР Ғылым және жоғары білім министрі Саясат Нұрбектің қолынан сертификат иеленді. Оқытушының курсы техникалық талаптар мен мазмұны бойынша оң бағасын алып, «Coursera» платформасында «Эукариоттық жасушаның құрылымдық-функционалдық ұйымдастырылуы немесе жасушаға саяхат» атты онлайн-курсы жарияланған. Профессор Coursera Kazakhstan командасымен бірлесіп әлемдік платформада өз материалдарын ұсына білді. Гүлназ Садықанова «Coursera қазақ тілінде» жобасы аясында авторлық сабағын жүктеген алғашқы қазақстандық ғалымдардың бірі.

— Бүгінгі күн мен үшін ерекше. ҚР Ғылым және жоғары білім министрі Саясат Нұрбектің қолынан марапат алу — еңбегімнің бағаланғаны. Мұнда еліміздің оқу орындары мен ғылыми ұйымдардың үздік ғалымдары мен оқытушылары, ұлттық және шетелдік серіктестер, халықаралық ұйымдардың өкілдері жиналды. Студенттердің оқуын жеделдету үшін ЖИ саласындағы өзекті тақырыптарды талқыладық.

Естеріңізге салайық, зерттеу нысаны жасуша биологиясы болды. Курстың мақсаты — жасушаны күрделі биологиялық жүйе ретінде зерттеу, оны физиологияны, генетиканы және молекулалық биологияны игеруде қолдану. Профессордың жұмысында жасуша теориясы, жасушаларды ұйымдастыру түрлері, эукариоттық жасушаның құрылымдық-функционалдық жүйелері, генетикалық ақпаратты сақтау, көбейту және енгізу жүйесі туралы соңғы мәліметтер ұсынылды.

Айта кетейік, ШҚУ қызметкерінің сапалы бейне курсы ЖОО-дағы «EdSmart Premium» интерактивті бейнежазбасының жаңа мультимедиялық студиясында жазылды. Сандық зертхана бейне-аудио жабдықтармен жабдықталған, бұл оқытушыларға заманауи әдістер мен құралдарды пайдалана отырып, Coursera платформасы үшін білім беру мазмұны мен курстарын дайындауға мүмкіндік береді.