ШҚУ БІЛІМ АЛУШЫСЫ «2024 ЖЫЛДЫҢ ҮЗДІК СТУДЕНТІ» АТАНДЫ

«Дене шынықтыру және спорт» білім беру бағдарламасының студенті, табысты таэквондошы Бекарыс Бекенов Қазақстанның дарынды жастары арасында өткізілген жыл сайынғы байқауда  «2024 жылдың үздік студенті» атағын иеленді. Спортшы студенттік өмірдегі табыстары мен жетістіктерін жоғары деңгейде таныстырып, қажырлы еңбек пен төзімділікті қажет ететін спорттық жеңістері ерекше аталып өтті.

— Мен барлық жарыстарға үлкен жауапкершілікпен қараймын: таңертеңгі және кешкі жаттығулар, техникамен жұмыс, спаррингтер, төзімділікті дамыту, қарсыластардың тактикасын талдау. Психологиялық дайындық та маңызды – шешуші сәттерде салқынқандылықты таныта білу. Бұл жолы басқаша болды. Мен өзімді тек спорттық жағынан ғана емес, басқа қырымнан лайықты түрде көрсетуім керек еді. Менің ойымша, қолымнан келді, — дейді Бекарыс.

Бірінші дәрежелі диплом мен «Үздік студент» куәлігін алғаннан кейін, Бекарыс спорттық мансабын әрі қарай жалғастыруды көздеп отыр. Оның айтуынша, таэквондо тек физикалық күш туралы ғана емес, сонымен қатар тәртіп, өзін-өзі бақылау, тұлғаның үздіксіз дамуы туралы.

-Қазір менің жоспарымда қысқы емтиханды сәтті тапсырып, жарыстарға толы маусымнан кейін денемді қалпына келтіру. Кейін халықаралық аренада  Қазақстанның намысын қорғауды жалғастырып, болашақта жас спортшылармен өз тәжірибеммен бөлісуім мүмкін,-деді Бекарыс.