СӘРСЕН АМАНЖОЛОВ УНИВЕРСИТЕТІНІҢ ТҮЛЕГІ, ҚАУІПСІЗДІК САЛАСЫНЫҢ АРДАГЕРІ СОВЕТ ИМАНҒАЛИЕВ СТУДЕНТТЕРМЕН КЕЗДЕСТІ

Бүгін Сәрсен Аманжолов атындағы Шығыс Қазақстан университетінде еліміздің қауіпсіздік саласында және мемлекеттік қызмет жүйесінде ұзақ жылдар бойы абыройлы қызмет атқарған университет түлегі, қауіпсіздік саласының ардагері Совет Иманғалиевпен мазмұнды кездесу өтті.

Кездесу барысында Совет Иманғалиев студенттермен өзінің кәсіби тәжірибесімен бөлісіп, мемлекеттік қызметтің жауапкершілігі, адалдық пен тәртіп, елге қызмет ету миссиясы туралы ойларын ортаға салды. Сонымен қатар жастарға кәсіби даму, тәртіп, сапалы білім және үздіксіз ізденіс туралы маңызды кеңестер берді.

Спикер өз сөзінде қазіргі заманға қажетті басты құндылықтарға тоқталды: патриотизм және құқықтық мәдениет, сыни ойлау және тәуелсіз шешім қабылдау, қоғамға пайдалы болу және азаматтық жауапкершілік, рухани төзімділік пен еңбекқорлық.

Студенттер үшін бұл кездесу үлкен мотивациялық тәжірибе болды. Олар еліміздің қауіпсіздігіне үлес қосқан тұлғаның өмір жолымен жақынырақ танысып, мамандық, мансап және қоғам алдындағы борыш жайында маңызды сұрақтарға жауап алды.

Шара соңында Совет Иманғалиев жастарға рух беретін тілегін білдірді:

«Қай салада жүрсеңіз де, әр кезде адалдық пен жауапкершілікті ту етіңіздер. Еңбектенуден шаршамаңыздар, үнемі ізденісте болыңыздар. Елге қызмет ету – ең үлкен мәртебе. Болашақ – сіздердің қолдарыңызда», — деді ардагер.

Бұл кездесу жастарға кәсіби бағдар беріп қана қоймай, елге адал қызмет етудің жоғары үлгісін көрсетті.