АКАДЕМИЯЛЫҚ КЕҢЕСТІҢ КЕЗЕКТІ ОТЫРЫСЫ ӨТТІ

Бүгін Сәрсен Аманжолов атындағы Шығыс Қазақстан университетінде Академиялық кеңестің кезекті отырысы өтті. Күн тәртібінде бес маңызды мәселе қаралды.

Отырыс барысында дуальды білім беруді дамыту мәселелері мен кафедра филиалдарының қызметі талқыланды. Осы бағыттағы баяндама­мен оқу-әдістемелік жұмысты ұйымдастыру бөлімінің басшысы Садірбекова Н.О. сөз сөйлеп, мамандарды даярлаудың бұл түрін одан әрі жетілдірудің негізгі бағыттарын және оның оқытудың практикалық бағдарын арттырудағы маңызын атап өтті.

Сондай-ақ IT және жаратылыстану ғылымдары жоғары мектебі, Педагогика жоғары мектебі, Бизнес және құқық жоғары мектебі, Гуманитарлық ғылымдар жоғары мектебі жанындағы Білім сапасын қамтамасыз ету комиссияларының қызмет нәтижелеріне ерекше назар аударылды. Жоғары мектеп декандары атқарылған жұмыстар бойынша есеп беріп, қол жеткізілген нәтижелер мен білім беру бағдарламалары мен академиялық үдерістердің сапасын арттыруға бағытталған өзекті міндеттерді айқындады.

Отырыс барысында университетте үштілді білім беруді дамыту мәселесі де қаралды. Жоғары мектеп декандары оқу-әдістемелік жұмысты ұйымдастыру бөлімінің басшысы Садірбекова Н.О.-мен бірлесіп, үштілді білім беруді дамыту жоспарларын ұсынып, олар білім беру қызметін жаңғыртудың және түлектердің бәсекеге қабілеттілігін арттырудың маңызды тетігі ретінде жан-жақты талқыланды.

Сонымен қатар 2025 жылға арналған оқу-әдістемелік әдебиеттерді шығару жоспарының орындалуы туралы ақпарат тыңдалып, 2026 жылға арналған оқу-әдістемелік әдебиеттерді шығару жоспарының жобасы қаралды. Садірбекова Н.О. аталған бағыттағы ағымдағы жағдайға талдау жасап, алдағы кезеңге арналған жұмыс бағыттарын ұсынды.