АМАНЖОЛОВ УНИВЕРСИТЕТІ ХАЛЫҚАРАЛЫҚ СЕРІКТЕСТІК АЯСЫН КЕҢЕЙТТІ

Бүгін Сәрсен Аманжолов атындағы Шығыс Қазақстан университеті мен Н.А. Добролюбов атындағы Нижегород мемлекеттік лингвистикалық университеті (Ресей Федерациясы) арасында ресми онлайн-кездесу өтті. Кездесу жоғары білім беру саласындағы халықаралық ынтымақтастықты дамытуға арналды және екі жоғары оқу орны арасындағы әріптестік байланыстарды нығайту жолындағы маңызды қадам болды.

Кездесу барысында тараптар білім беру мен ғылым саласындағы өзара іс-қимылдың негізгі бағыттарын талқылады. Атап айтқанда, студенттер мен профессор-оқытушылар құрамының академиялық алмасу мүмкіндіктері, профессор-оқытушылар құрамының тағылымдамадан өтуі және тәжірибе алмасу мәселелері қарастырылды. Бұл бастамалар білім алушылар мен оқытушыларға халықаралық академиялық ортада тәжірибе жинақтауға, кәсіби және ғылыми құзыреттерін арттыруға мүмкіндік береді.

Сонымен қатар, бірлескен ғылыми конференциялар ұйымдастыру, ғылыми-зерттеу жобаларын іске асыру және халықаралық ғылыми басылымдарда бірлескен мақалалар жариялау мәселелеріне ерекше назар аударылды. Мұндай ынтымақтастық екі университеттің ғылыми әлеуетін арттырып, зерттеушілердің академиялық белсенділігін күшейтуге ықпал етеді.

Кездесу аясында қос дипломды білім беру бағдарламаларын кезең-кезеңімен іске қосу перспективалары да талқыланды. Бұл бастама білім беру бағдарламаларын халықаралық академиялық кеңістікке кіріктіруге, сондай-ақ түлектердің еңбек нарығындағы бәсекеге қабілеттілігін арттыруға бағытталған.

Кездесу қорытындысы бойынша Н.А. Добролюбов атындағы Нижегород мемлекеттік лингвистикалық университеті мен Сәрсен Аманжолов атындағы Шығыс Қазақстан университеті арасында халықаралық ынтымақтастық туралы меморандумға қол қойылды.