АМАНЖОЛОВ УНИВЕРСИТЕТІНДЕ МИНЕРАЛДЫ ТЫҢАЙТҚЫШТАРДЫ ТАЛДАУ БОЙЫНША АШЫҚ САБАҚ ӨТТІ

Химия кафедрасында жаратылыстану ғылымдары магистрі, сениор-лектор Оразова Сән Советбековнаның жетекшілігімен «Минералды тыңайтқыштар талдауы» тақырыбында ашық сабақ өткізілді. Бұл сабақ студенттердің кәсіби құзыреттілігін арттыруға, теориялық білімдерін тәжірибелік тұрғыда қолдануға бағытталды.

Сабаққа «Химия және наноматериалдар» және «Химиялық криминалистикалық сараптама» білім беру бағдарламаларының 3 курс студенттері қатысты. Оқу процесі интерактивті форматта ұйымдастырылып, қатысушылар фермерлер, кеншілер, химиктер және экологтар сияқты әртүрлі кәсіби рөлдерге бөлінді. Бұл тәсіл студенттерге тақырыпты жан-жақты қарастыруға және нақты өмірлік жағдайлармен байланыстыруға мүмкіндік берді.

Сабақ барысында Қазақстан мен әлемдегі минералды тыңайтқыштар өндірісі кеңінен талқыланды. Сонымен қатар олардың қоршаған ортаға әсері, химиялық құрамы, сапасын анықтау әдістері және зертханалық-сараптамалық талдау жүргізу жолдары қарастырылды. Студенттер өз рөлдері аясында тыңайтқыштардың ауыл шаруашылығындағы маңызын, экологиялық қауіпсіздігін және өндірістік ерекшеліктерін жан-жақты талдап, пікір алмасты.

Ашық сабақтың ерекшелігі – оның жоғары әдістемелік деңгейде және белсенді интерактивті форматта өтуі. Бұл студенттердің тек теориялық білімін тереңдетіп қана қоймай, сонымен қатар аналитикалық ойлау қабілетін, командалық жұмыс дағдыларын және кәсіби көзқарасын дамытуға ықпал етті.

Жалпы алғанда, өткізілген сабақ болашақ химиктер мен сарапшылардың кәсіби дайындығын күшейтетін маңызды білім беру тәжірибесі ретінде бағаланды.