AMANZHOLOV UNIVERSITY-ДЕ ТАЗА СУ МЕН СУ РЕСУРСТАРЫН САҚТАУҒА АРНАЛҒАН СЕМИНАР ӨТТІ

Сәрсен Аманжолов атындағы Шығыс Қазақстан университетінің IT және жаратылыстану ғылымдары жоғары мектебіне қарасты Экология және география кафедрасында су ресурстарын сақтау мен экологиялық қауіпсіздікті қамтамасыз етудің өзекті мәселелеріне арналған «Таза су және санитария: қазіргі заманғы сын-қатерлер мен тұрақты даму жолдары» атты семинар өтті.

Іс-шараны Экология және география кафедрасының профессоры Күлзипа Дакиева ұйымдастырды. Семинар 2026–2027 оқу жылына арналған Тұрақты даму мақсаттарын іске асыру жоспары аясында өткізіліп, су ресурстарын ұтымды пайдалануға қатысты экологиялық мәселелерді талқылауға мүмкіндік берді.

Семинарда Шығыс Қазақстан облысындағы сумен жабдықтау мәселелеріне баса назар аударылды. Атап айтқанда, жерүсті және жерасты суларының ластануы, су нысандарына антропогендік әсер, халықты сапалы ауызсумен қамтамасыз ету, сарқынды суларды тазарту, экологиялық мониторингті жетілдіру және су үнемдеу технологияларын енгізу мәселелері қарастырылды.

Сонымен қатар БҰҰ-ның 6-тұрақты даму мақсаты – «Таза су және санитария» мәселесіне ерекше көңіл бөлінді. Талқылау барысында халықтың денсаулығы мен әл-ауқатын жақсарту, тұрақты қалалар мен елді мекендерді дамыту, жауапты тұтыну мен өндірісті қалыптастыру, климаттың өзгеруіне қарсы күрес және құрлық экожүйелерін сақтау сияқты жаһандық басымдықтар да қамтылды. Бұл бағыттардың барлығы өзара тығыз байланысты. Өйткені таза суға қолжетімділік, су ресурстарын тиімді пайдалану және табиғи экожүйелерді қорғау – қоғамның тұрақты дамуының маңызды шарттары.

Семинарға қатысу білім алушылардың кәсіби білімін тереңдетіп, заманауи экологиялық мәселелер жөніндегі түсінігін кеңейтуге және табиғи ресурстарды сақтауда болашақ мамандардың рөлін тереңірек ұғынуға мүмкіндік берді. Мұндай іс-шаралар экологиялық мәдениетті қалыптастыруға, қоршаған ортаға жауапкершілікпен қарауға және алған білімді өңірдің өзекті мәселелерін шешуге қолдануға ықпал етеді.

Таза су – адам денсаулығының, экологиялық қауіпсіздіктің және Қазақстанның тұрақты болашағының негізі. Оны сақтау әр адамның жауапкершілігін, сондай-ақ ғылым, білім беру саласы мен қоғамның бірлескен күш-жігерін талап етеді.