ШҚУ-ДА ПЕДАГОГИКАЛЫҚ ҚАЙТА ДАЯРЛАУ КУРСТАРЫ ЖҮРІП ЖАТЫР

С.Аманжолов атындағы ШҚУ-да кәсіби даярлық және біліктілікті арттыру ресурстық орталығы 1 қазаннан бастап жоғары (педагогикалық емес) кәсіптік білім алған тұлғалар үшін «Педагогикалық қайта даярлау» курстарын бастады.

Педагогикалық қайта даярлау бағдарламасы педагогикалық білімі жоқ, бірақ мектептерде сабақ бергісі келетін адамдарға арналған. Бағдарламаға тиісті мамандық бойынша жоғары білімі бар адамдар жазыла алады.

— Педагогикалық қайта даярлау курстарына келушілер көп. Олар С.Аманжолов атындағы ШҚУ-дан білімдерін жаңартып, жаңа мүмкіндікке ие болады. Белгілі бір саланың кәсіби қызметкері педагог мәртебесі жоқтығынан мектептерде сабақ бере алмай жүрген болса, осы курс арқылы оқу орындарында сабақ бере алады, — деді кәсіптік даярлау және біліктілікті арттыру ресурстық орталығы директоры Бақытгүл Исебаева.

Курс соңында тыңдаушылар қорытынды аттестациядан өтіп, мектепте мұғалімі ретінде жұмыс істеуіне рұқсат беретін арнайы сертификатқа ие болады.