КЕДЕРГІСІЗ АҒЫЛШЫН ТІЛІ 50+

Amanzholov University-де «Күміс университет 50+» бағдарламасы аясында елу жастан асқан қала тұрғындарына ағылшын тілін базалық деңгейде үйрететін курс басталды.

Курс мақсаты егде жастағы адамдардың әлеуеметтік еңбек белсенділігін, психологиялық және зерде саулығын сақтау. Орта жастан асқан адамдардың заман талабына сай біліммен қамтамасыз ету, араласу ортасын кеңейту.

— Бүгін «Күміс университет 50+» бағдарламасы аясында ағылшын тілі курсы басталды. Келушілер бір ай бойы ағылшын тілін базалық деңгейде тегін үйрене алады. Қатысушылардың арасында білім саласындағы мамандар көп, — деді Кәсіптік даярлау және біліктілікті арттыру ресурстық орталығының директоры Бақытгүл Исебаева.

Курс ағылшын тілін ауыз-екі сөйлеу стилінде үйретеді. Сабақ барысында қатысушылар арасында диалог құрылып, өзара сөйлеу тілдерін жаттықтырады және әртүрлі тапсырмаларды орындайды.

— С.Аманжолов атындағы ШҚУ базасындағы «Күміс университет 50+» бағдарламасының би үйрену курсына қатысып, денсаулығымды жақсыратуға күш салғанмын. Қазір ағылшын тілін меңгеруге ден қойып, ЖОО-дағы курсқа жазылдым. Біздің жасымыздағы кісілерге осындай курстардың болуы ақыл-ойымызды сергек, еңбекке қабілетті болуымызға әсер етеді, — деді курсқа қатысушы Нұржан Рүстемова.

«Күміс университет 50+» бағдарламасы аясында ағылшын тілінің базасын үйренуге 15 адам тіркелген.