ШҚУ-ДА ҚЫСҚЫ КУРАТОРЛАР МЕКТЕБІ ӨТТІ

С.Аманжолов атындағы ШҚУ-да Педагогика, IT технологиялар және жаратылыстану жоғары мектептерінің кураторларына арналған «Қысқы кураторлар мектебі» өтті. Іс-шарада алдағы семестрде студенттердің білімін жетілдірумен қатар тәрбиелік жұмыстарды ұйымдастырудың негізгі бағыттары таныстырылды.

– Біздің университеттің тәрбие жұмысы «толық адам» іліміне негізделген. «Жылы жүрек, ыстық қайрат, нұрлы ақылды» білім алушыларға түсіндіруіміз керек. Осы үшеуі нашақорлыққа да, лудоманияға да қарсы тұрады. Қарызсыз қоғамды да құратын осы қасиеттер. Адами құндылықтар болмаса, біз тек «құрғақ» білім ғана беріп, студенттерді тәрбиесіз қалдыруымыз мүмкін. Сол себепті біздің жоғары оқу орын білім алушылардың тәрбиесін, олардың қоғамдық жұмысқа тарту мәселесін күн тәртібінен түсірмейді, – деді тәрбие және әлеуметтік жұмыс жөніндегі проректор Жаннета Калимолдина.

Шараға ШҚО бойынша Экономикалық тергеу департаментінің ұйымдастыру-бақылау басқармасының жетекшісі Жанар Тайгаранова, ШҚО Халифа Алтай атындағы мешіттің іс басқарушысы Берік Кәдіров, ШҚУ-дың комплаенс-офицері Қайнар Жексембаев қатысып, өз салалары бойынша баяндама жасады.

Кураторлар мектебінде студенттер арасында құқықбұзушылықтардың алдын алу, жемқорлыққа қарсы мәдениетті қалыптастыру, ұлттық және адамгершілік құндылықтарды насихаттау, жастарды деструктивті ағымдардан қорғау бағытында ұйымдастырылатын шаралар талқыланды.

Шара соңында жыл көлемінде жемісті жұмыс атқарған кураторлар Алғыс хаттармен марапатталды.