ЕРЕКШЕ БІЛІМ БЕРУ ҚАЖЕТТІЛІКТЕРІ БАР БАЛАЛАРДЫҢ ЦИФРЛЫҚ САУАТТЫЛЫҒЫН ДАМЫТУҒА АРНАЛҒАН СЕМИНАР ӨТТІ

Сәрсен Аманжолов атындағы Шығыс Қазақстан университетінде «Қазақстандағы ерекше білім беру қажеттіліктері бар балалардың функционалдық цифрлық сауаттылығын дамыту: ассистивті технологиялар» тақырыбында екі күндік семинар ұйымдастырылды.

Іс-шараны ҚР БҒМ «Алтынсарин атындағы Ұлттық білім академиясы», Қазақстандағы БҰҰ Балалар қоры (ЮНИСЕФ) және Инклюзивті білім беруді қолдау бойынша орта білім беру мектептерінде тәжірибе тарату орталығы бірлесіп өткізді.

Семинардың мақсаты – инклюзивті білім беруді қолдау бойынша мектептерде қолайлы жағдай жасау, функционалды цифрлық сауаттылық пен ассистивті технологияларды тиімді қолдану тәжірибесін арттыру болды.

Қатысушылар қатарында педагог-психологтар, дефектолог-логопедтер, информатика пәні мұғалімдері және арнайы білім беру саласының мамандары болды.

Семинар бағдарламасында инклюзивті білім берудің мазмұны, АКҚ (альтернативті және қосымша коммуникация) жүйелері, баланың қарым-қатынас деңгейін түсіну, сурет алмасу (PECS), СBoard қосымшасы, коммуникация нәтижелерін бағалау, сондай-ақ аутизмі бар балаларға арналған АКҚ мақсаттарын қою мәселелері қамтылды.

Мамандар екі күн бойы тәжірибелік тренингтерге қатысып, инклюзивті білім беру саласындағы заманауи технологиялар мен әдістемелерді меңгерді.