ЦИФРЛЫҚ ТЕХНОЛОГИЯЛАРДЫҢ БОЛАШАҒЫ: СӘРСЕН АМАНЖОЛОВ АТЫНДАҒЫ ШҚУ СТУДЕНТТЕРІ ЖАСАНДЫ ИНТЕЛЛЕКТ ЖОБАЛАРЫН ҰСЫНДЫ

Қазақстанда 2025 жылғы 29 қыркүйек пен 4 қазан аралығында өткен «Жасанды интеллект апталығы» аясында «IT-жобалаудағы жасанды интеллект» тақырыбында студенттік ғылыми жобалар байқауы өтті. Іс-шараны Сәрсен Аманжолов атындағы Шығыс Қазақстан университетінің Компьютерлік модельдеу және ақпараттық технологиялар кафедрасы ұйымдастырды. Байқаудың мақсаты – талантты жастардың авторлық идеяларын анықтау және қолдау, сондай-ақ цифрлық технологиялар саласындағы зерттеу бастамаларын дамыту болды.

Байқау Қазақстан Республикасының Президенті Қасым-Жомарт Тоқаевтың 2025 жылғы 8 қыркүйектегі «Жасанды интеллект дәуіріндегі Қазақстан: өзекті міндеттер және оларды цифрлық трансформация арқылы шешу» атты Жолдауына және ҚР Ғылым және жоғары білім министрлігінің тапсырмасына сәйкес өткізілді.

Байқауға «Робототехника және жасанды интеллект», «Информатика (IP)», «Ақпараттық жүйелер», «Математика-Информатика» және «Компьютерлік мехатроника» білім беру бағдарламалары бойынша 1–4 курс студенттері қатысты. Олардың жобалары жасанды интеллекттің келешегі зор бағыттарын қамтыды: машиналық оқыту, генеративті технологиялар, білім берудегі цифрлық құралдар, үлкен деректерді талдау және қолданбалы шешімдер әзірлеу.

Ұсынылған жобалардың қатарында «AI Student Time Manager» – уақытты тиімді жоспарлауға арналған жүйе, «AI Design Hub» – цифрлық шығармашылық өнімдермен жұмыс істеуге арналған платформа, сондай-ақ білім беру мен әлеуметтік бағыттағы түрлі чат-боттар болды.

Көрермендер мен сарапшылардың ерекше қызығушылығын «Damumed және Жасанды Интеллект» жобасы, студенттердің код сапасын талдайтын қосымша, оқу барысындағы фотосуреттер сапасын жақсартуға арналған жүйе, буллинг туралы анонимді хабарламаларға арналған Telegram-бот және студенттер мен оқытушыларды қолдауға бағытталған интеллектуалды платформалар тудырды. Бұл идеялар жасанды интеллекттің қолданыс аясының кеңдігін – медициналық, білім беру және әлеуметтік бастамаларға дейін – айқын көрсетті.

Байқау қорытындысы бойынша «Информатика (IP)» білім беру бағдарламасының студенттері Сырым Әлімбеков пен Нұрасыл Кеңесхановтың, «Робототехника және жасанды интеллект» бағытының студенттері Алексей Хорев пен Ярослав Русаковтың, сондай-ақ «Ақпараттық жүйелер» мамандығы бойынша оқитын Асхат Чериязданов, Нұржан Нұрлықанов және Нұрасыл Орманбековтің жобалары жоғары бағаланды. Сонымен қатар, осы бағыттағы студент Мерхат Мақсатұлының жұмысы да ерекше атап өтілді.

Бұл байқау жасанды интеллект саласындағы студенттік идеяларды ұсынуға арналған маңызды алаңға айналды. Ол жастардың ғылым мен инновацияға деген жоғары қызығушылығын, сондай-ақ цифрлық шешімдер арқылы Қазақстандағы білім, технология және әлеуметтік бастамаларды дамытуға қосар үлесін айқын көрсетті.