ҒАЛЫМДАРДЫҢ ЖАҢА ҰРПАҒЫ: AMANZHOLOV UNIVERSITY–ДЕ 19 ОҚУШЫ ҒЫЛЫМИ ЖОБАЛАРЫН ЖҮЗЕГЕ АСЫРУДА

С.Аманжолов атындағы Шығыс Қазақстан университетінде 19 бала ғылыми зерттеулермен және авторлық жобаларын жүзеге асырумен айналысуда. Альма-матерде «Мектеп-студент-магистр-доктор-ғылыми қызметкер» тізбегі бойынша кадрлерді даярлау жүйесі сәтті жұмыс істейді.

Осындай тәсілдер арқылы оқытудың көптеген жарқын мысалдары бар. Мәселен, он бірінші сынып оқушысы Әмір Хамитов суды тиімді тазартуға қажетті полианилин мен биополимер негізіндегі мембрана алады. НЗМ-нің оқушылары Қанатбек Ахметхан мен Мирас Жомартов биополимер негізіндегі қорғаныс биожабын жасауда. Ол оптикалық құрылғылардың бетін механикалық кернеуден қорғауға арналған.

Дарынды балаларға арналған Валеологиялық мамандандырылған мектеп-кешенінің 2-сынып оқушысы Адият Ержанов бақыланатын фотопериодизмі бар өсімдіктердің өсу биостимуляторын сынақтан өткізуде.

-Адияттың анасы ретінде университет басшылығына осындай ұзақ мерзімді перспективаларға көңіл бөлгені үшін үлкен алғысымды білдіремін. Бірінші сыныптан бастап ғалым болу мүмкіндігі баланың сыни ойлауын, дербестігін, білуге құштарлығын, логикасын, жауапкершілігін дамытады. Білім берудегі бұл тәсіл де кәсіптік бағдар беруге жатады. Мен ұлымның жарқын болашағына сенімдімін, — деді Альмира Жайсанбаева.

Оныншы сынып оқушысы Камилла Саскенова биотехнологиялық әдістерді қолданып, янтарь қышқылы қосылған тыңайтқыш негізіндегі қоректік ортаны картопқа in vitro жағдайында сынаумен белсенді түрде айналысуда.

Опытное Поле орта мектебінің оқушылары Полина Кравченко мен Рената Кашегулова республикалық ғылыми конкурс аясында «Шығыс Қазақстанда биотехнологияны қолдана отырып түйнек дақылдарының өнімділігін арттыру үшін өсу стимуляторларымен бірге биофунгицидтерді жасау және қолдану» тақырыбында жоба қорғады.

-Түйнек дақылдарының тамырын қалыптастыруға арналған фунгицидті ынталандыратын қасиеттері бар біздің тыңайтқышымыз экологиялық мәселелерді шешуде шешуші қадам бола алады, өйткені қауіпсіз тыңайтқыштарды пайдалану өнімділікті арттыруға және өсімдіктерді қорғауға көмектеседі, — деп түсіндірді Полина.

Оқушылар барлық зерттеулерді С.Аманжолов атындағы ШҚУ-дың материалдық-техникалық құралдармен жабдықталған зертханасында жүргізді.

-С.Аманжолов атындағы ШҚУ тек студенттерді оқытып қана қоймай, дарынды жастарды ғылыми ортаға тартып, өңірдегі ғылымның дамуына үлес қосады. Балалар мектеп табалдырығынан бастап ғылыми мансабын жасауға негіз болатын практикалық білім базасын қалыптастырады. Ал бұл нарықтағы басқа қызметкерлермен салыстырғанда үлкен артықшылық, — деді ШҚУ-дың ғылыми қызметкері Валентина Николаева.

Бірегей білім жүйесінің жемісті табысының дәлелі – Нариман Қайырбеков. Ол Альма-матердің студенті бола жүріп полиэтиленді алмастыратын материал жасап шығарды. ШҚУ қабырғасында оқушы кезінен жүрген ол осы уақытқа дейін сүйікті зертханасында еңбек етіп келеді. Бүгінде ол — кіші ғылыми қызметкер және өңірлік университеттің магистрі.