АМАНЖОЛОВ УНИВЕРСИТЕТІНІҢ ҒЫЛЫМЫ МЕН ДАМУЫ ҮШІН ЖАҢА МҮМКІНДІКТЕР

Сәрсен Аманжолов атындағы Шығыс Қазақстан университетіне 2026–2027 оқу жылына жоғары оқу орнынан кейінгі білім беруге арналған мемлекеттік білім беру тапсырысы бойынша 30 орын бөлінді.

Мемлекеттік білім беру тапсырысы ғылыми кадрлар даярлау мен университеттің зерттеу әлеуетін нығайтуға жаңа мүмкіндіктер ашады. Бұл – университеттің даму стратегиясын жүзеге асырудағы және Шығыс Қазақстанның кадрлық әлеуетін қалыптастырудағы маңызды қадам.

Бүгінде университет педагогика, STEM, IT және жасанды интеллект, физика және басқа да перспективалы бағыттарды дамытып келеді. Жұмыстар заманауи сын-қатерлерді, өңірдің қажеттіліктерін және адами капиталды дамыту міндеттерін ескере отырып жүргізілуде.

Университеттің 2030 жылға дейінгі стратегиялық мақсаттарына сәйкес:

— өз мамандығы бойынша жұмыс істейтін түлектердің үлесін кемінде 70%-ға жеткізу;

— кәсіпорындармен 10-нан астам бірлескен жобаны жүзеге асыру;

— ғылыми зерттеулердің кемінде 15 нәтижесін өндіріске енгізу;

— университеттің Erasmus+ жобаларына қатысуын кеңейту;

— докторлық диссертация қорғау санын екі есеге арттыру жоспарлануда.

Заманауи ғылыми инфрақұрылым құруға ерекше көңіл бөлінуде. Университетте гибридті STEM-аймақтар мен AI-зертханаларын, «Адал Азамат» электронды кітаптар орталығын, сондай-ақ ядролық және радиациялық технологиялар саласындағы зерттеу инфрақұрылымын дамыту жоспарланған.

Мемлекеттік білім беру тапсырысының 30 орны – жас зерттеушілер үшін жаңа мүмкіндіктер, ғылыми бастамаларды дамыту және өңірде және одан тыс жерлерде сұранысқа ие мамандар даярлау үшін маңызды мүмкіндік.