РЕКТОР – ДАМУ БЕЛГІСІ: AMANZHOLOV UNIVERSITY БОЛАШАҚ УНИВЕРСИТЕТІНЕ ҚАРАЙ

Сәрсен Аманжолов атындағы Шығыс Қазақстан университеті бүгінде өңірдің білім беру орталығы ғана емес, ғылымды, инновацияны және заманауи педагогикалық тәжірибелерді енгізудің жетекші алаңына айналып отыр. Соңғы сегіз жыл бойы университетті Мұхтар Төлеген басқарып келеді. Осы кезеңде жоғары оқу орны ауқымды трансформациядан өтіп, білім сапасын арттыруға, ғылыми әлеуетті нығайтуға, инновациялық технологияларды енгізуге және халықаралық ынтымақтастықты кеңейтуге бағытталған стратегиялық даму моделін қалыптастырды.

Сегіз жыл ішінде университет сенімге, жауапкершілікке және жасампаздыққа негізделген ортаға айналды. Мұнда стратегиялық шешімдер студенттерге, оқытушыларға және зерттеушілерге деген мұқият көзқараспен ұштасады. 2025 жылға қарай ШҚУ институционалдық кемелдікке жетіп, жекелеген бастамалардан тұрақты әрі жүйелі даму моделіне көшті.

Бүгінде жоғары және жоғары оқу орнынан кейінгі білім беру 154 білім беру бағдарламасы бойынша жүзеге асырылады. Бұл бағдарламалар өңір мен елдің әлеуметтік-экономикалық дамуының негізгі бағыттарын қамтиды. Бағдарламалардың 91 пайызы жаңартылып, олардың практикалық бағыты күшейтіліп, еңбек нарығымен ықпалдастығы артты. Білім беру үдерісі жаңа мамандықтар атласы, цифрлық дағдылар және Индустрия 4.0 талаптарын ескере отырып, құзыреттілік моделіне негізделген.

Университет үш жыл қатарынан педагогикалық жоғары оқу орындары арасында кадр даярлау сапасын бағалау нәтижелері бойынша елімізде бірінші орынды иеленді. Инклюзивті білім беру тәсілдері едәуір жаңартылып, «балабақша – мектеп – колледж – университет» өңірлік моделі қалыптастырылды. Бұл модель Қазақстан Республикасы Ғылым және жоғары білім министрлігі мен Үкіметі тарапынан қолдау тапты. Үздіксіз білім беру қағидаты барлық буынды қамтитын «Күміс университет» жобасы арқылы жүзеге асырылуда.

Үздіксіз және инклюзивті білім беру орталығы «Dana bala» дуальды оқытудың, ғылыми зерттеулердің және инклюзивті білім беру жағдайында студенттердің практикалық даярлығының негізгі өзегіне айналды. Мұнда жасанды интеллектіні қолдана отырып, заманауи педагогикалық технологиялар мен пәнаралық жобалар енгізілуде. Студенттер инклюзивті білім беруді қолдауға арналған интерактивті платформалар мен Telegram-боттарды қоса алғанда, цифрлық білім беру шешімдерін әзірлеуде.

Халықаралық ынтымақтастық та қарқынды дамуда. Университет 36 елдің 160 жоғары оқу орнымен серіктестік орнатқан, QS Asia, QS Stars, UI GreenMetric және Webometrics рейтингтеріне қатысады, сегіз халықаралық қауымдастықтың мүшесі және Times Higher Education рейтингінің респонденті болып табылады. 2025 жылы ШҚУ Шанхай ынтымақтастық ұйымына мүше болды. Интернационалдандыру аясында 2027 жылы Италияның Генуя университетінің филиалын ашу, сондай-ақ ағылшын тіліндегі білім беру бағдарламаларын кеңейту жоспарлануда.

Ғылыми қызмет айтарлықтай өсім көрсетті: 2023–2025 жылдары ғылыми зерттеулер бюджеті 3,5 есеге артып, 4,6 млрд теңгені құрады. Ғалымдардың еңбекақысы өсіп, қорғалған диссертациялар мен халықаралық дерекқорларда жарияланған мақалалар саны артты. Бірыңғай инновациялық-технологиялық экожүйе қалыптасуда: технопарк, стартаптар, инновациялық гранттар және ғылыми әзірлемелерді коммерцияландыру бағыттары дамып келеді. AI-SANA бағдарламасы аясында жеті мыңнан астам студент жасанды интеллектіні меңгерді, ал құрылған ЖИ орталығы университеттің технологиялық жобаларының өзегіне айналды.

Білім алушылар контингенті 10 мың адамға жетті, магистранттар мен докторанттар санының артуы университеттің ғылыми әлеуетін айтарлықтай нығайтты. Студентке бағдарланған оқыту қағидаттары жүзеге асырылып, жатақханаларға, инфрақұрылымға және ресурстарға қолжетімділік қамтамасыз етілуде, студенттік бастамалар жан-жақты қолдау табуда.

Заңдылық мәдениеті мен академиялық адалдықты қалыптастыруға ерекше назар аударылады: Академиялық адалдық кодексі жұмыс істейді, жұмыстардың түпнұсқалығын тексерудің цифрлық жүйелері енгізілген, студенттер мен оқытушылар арасында жүйелі профилактикалық жұмыс жүргізіледі.

Мұхтар Төлегеннің басшылығымен университет тұрақты даму жолын жалғастырып, заманауи сын-қатерлерге лайықты жауап беріп, ғылымға, инновацияға және адамға бағдарланған болашақ университеті ретінде қалыптасып келеді.